ప్రస్తుతం స్టైలిష్ స్టార్ అల్లు అర్జున్ హీరోగా క్యాలిక్యులేటెడ్ దర్శకుడు సుకుమార్ దర్శకత్వంలో తెరకెక్కుతున్న చిత్రం పుష్ప. ఈ సినిమాపై ప్రేక్షకుల్లో రోజురోజుకు అంచనాలు పెరిగిపోతున్నాయన్న విషయం తెలిసిందే. ఎర్రచందనం స్మగ్లింగ్ నేపథ్యంలో ఈ సినిమా సాగనుందని టాక్ వినిపిస్తుండగా ఈ సినిమాలో స్టైలిష్ స్టార్ అల్లు అర్జున్ లారీ డ్రైవర్ పాత్రలో కనిపించబోతున్నారు. ఇప్పటికే ఈ సినిమాకు సంబంధించి విడుదలైన ఫస్ట్ లుక్ ప్రేక్షకుల్లో భారీ అంచనాలను పెంచింది.
అయితే పుష్ప సినిమాలో అల్లు అర్జున్ ను ఢీ కొట్టే విలన్ పాత్రలో తమిళ నటుడు విజయ్ సేతుపతిని తీసుకున్నారని.. మొదట టాక్ వచ్చింది. ఆ తర్వాత మరో నటుడు మాధవన్ ను ఫైనల్ చేశారు అంటూ టాలీవుడ్ లో వార్తలు వచ్చాయి. అయితే తాజాగా ఈ వార్తలపై క్లారిటీ ఇచ్చారు మాధవన్. తాను పుష్ప సినిమాలో నటించడం లేదని సోషల్ మీడియాలో వస్తున్న వార్తలు అన్ని అవాస్తవం అంటూ తెలిపారు. దీంతో పుష్ప సినిమాలో విలన్ గా నటించబోయేది ఎవరు అన్న చర్చ మరోసారి ఊపందుకుంది.
