ఉత్తర్ప్రదేశ్ కాన్పుర్లో ఘోరం జరిగింది. సెప్టిక్ ట్యాంక్ మూతను తెరిచే క్రమంలో ముగ్గురు యువకులు విషపూరిత వాయువులు పీల్చి మరణించారు. మృతులు చౌబేపుర్ ప్రాంతానికి చెందిన నందు (18), అతని సోదరుడు మోహిత్ (24), సాహిల్ (16)గా పోలీసులు గుర్తించారు. నందు, మోహిత్.. సెప్టిక్ ట్యాంక్ నిర్మాణాలు చేపడుతుంటారు. వారి దగ్గర సాహిల్ అనే యువకుడు కూలీగా పనిచేస్తున్నాడు.
మొదటగా సాహిల్.. సెప్టిక్ ట్యాంక్లోకి వెళ్లి విషపూరిత వాయువులు పీల్చి స్పృహ కోల్పోయాడు. అతడిని రక్షించేందుకు ట్యాంక్లో దిగిన నందు, మోహిత్ కూడా అపస్మారక స్థితికి చేరుకున్నారు. అగ్నిమాపక సిబ్బంది ఘటనాస్థలికి చేరుకుని ముగ్గురు యువకులను బయటకు తీసి ఆస్పత్రికి తరలించారు. అప్పటికే వీరు ముగ్గురు చనిపోయినట్లు వైద్యులు ధ్రువీకరించారు.
ఇటీవల సెప్టిక్ ట్యాంక్ వల్ల మరణాలు పెరుగుతున్నాయి. సాంకేతిక పరిజ్ఞానం ఎంత పెరిగినా కార్మికులు సెప్టిక్ ట్యాంక్ క్లీనింగ్ కోసం ఇంకా కార్మికులే స్వయంగా వాటిలో దిగుతున్నారు. విషపూరిత వాయువు పీల్చి ప్రాణాలు కోల్పోతున్నారు. ఈ క్రమంలో సెప్టిక్ ట్యాంక్ క్లీనింగ్ కోసం మనుషుల్ని కాకుండా యంత్రాలను ఉపయోగించేలా చర్యలు తీసుకోవాలని ప్రభుత్వాన్ని కోరుతున్నారు పలువురు కార్మికులు.
