భారతదేశం చేపట్టిన ‘ఆపరేషన్ సిందూర్’ ప్రపంచవ్యాప్తంగా విశేషంగా మారింది. పాకిస్తాన్‌లో ఉగ్రవాద స్థావరాలపై భారత దాడులకు అంతర్జాతీయ మీడియా విస్తృత కవరేజీ ఇచ్చింది. ఈ చర్య వెనుక ఉన్న నేపథ్యాలు, వ్యూహాలు, మరియు భవిష్యత్తు పర్యవసానాలపై గౌరవనీయ పత్రికలు విశ్లేషణలు చేయగా, చాలా దేశాలు భారత్ చర్యను ఉగ్రవాదంపై ఆత్మరక్షణ చర్యగా అభివర్ణించాయి.
న్యూయార్క్ టైమ్స్
“కశ్మీర్ దాడి తర్వాత పాకిస్థాన్ లోపల భారత్ క్షిపణి దాడులు” అనే శీర్షికతో కథనాన్ని ప్రచురించిన న్యూయార్క్ టైమ్స్, ఈ చర్యను భారత్-పాకిస్థాన్ మధ్య ఉద్రిక్తతలలో కీలక మలుపుగా అభివర్ణించింది. భారత్ ముందుగానే అమెరికాకు సమాచారం ఇచ్చినట్లు పేర్కొంటూ, అంతర్జాతీయ ఘర్షణ తగ్గించే భారత యత్నాన్ని హైలైట్ చేసింది.
సీఎన్ఎన్
“భారత్, పాకిస్థాన్ విస్తృత ఘర్షణ అంచున” అనే శీర్షికతో ప్రముఖ వార్తా ఛానెల్ సీఎన్ఎన్ ఈ సంఘటనను కవర్ చేసింది. భారత వైమానిక దళం ఆధునిక ఆయుధాలను ఉపయోగించి ఉగ్ర స్థావరాలపై సమర్థవంతమైన దాడులు జరిపినట్టు తెలిపింది. పౌరులపై ప్రభావం లేకుండా దాడులు జరిగినట్టు పేర్కొంది.
వాషింగ్టన్ పోస్ట్
“భారత్ దాడులు – ఉద్రిక్తతలు పెరిగాయి, పాకిస్తాన్ స్పందనకు సిద్ధం” అనే కథనంలో, భారత్ చర్యను పరిమిత స్థాయిలో జరిగిన బల ప్రదర్శనగా అభివర్ణించింది. భారత వైఖరిని సంయమితమైన చర్యగా వివరించింది.
బీబీసీ
బహవల్పూర్, మురిద్కే ప్రాంతాల్లోని ఉగ్ర కేంద్రాలే ప్రధాన లక్ష్యంగా ఉన్నాయంటూ బీబీసీ వెల్లడించింది. ఈ దాడుల వల్ల భవిష్యత్తులో ప్రాంతీయ స్థాయిలో ఉద్రిక్తతలు పెరిగే అవకాశాన్ని కూడా పత్రిక ప్రస్తావించింది.
ది టైమ్స్ ఆఫ్ ఇజ్రాయెల్
భారత్‌కు ఉగ్రవాదంపై పోరాడే హక్కు ఉందని పేర్కొంటూ, భారత చర్యకు మద్దతు తెలిపింది. “భారత్‌కి తనను తాను రక్షించుకునే పూర్తి హక్కు ఉంది” అనే వాక్యంతో కథనాన్ని ప్రచురించింది.
ఇతర ప్రముఖ మీడియా సంస్థలు ది గార్డియన్, వాల్ స్ట్రీట్ జర్నల్, ఫైనాన్షియల్ టైమ్స్, షికాగో ట్రిబ్యూన్, ఏబీసీ న్యూస్, లే మోండే (ఫ్రాన్స్), జపాన్ టైమ్స్, జపాన్ టుడే తదితరాలు కూడా ఈ అంశంపై సమగ్ర విశ్లేషణలు చేశాయి. వీటి సాధారణ నడుమ అభిప్రాయం ఏమిటంటే — భారత్ చర్య ఉగ్రవాదంపై ఒక కట్టుదిట్టైన, రక్షణాత్మక చర్యగా పరిగణించాలి.
