అమెరికాలో మరోసారి కాల్పులు కలకలం రేపాయి. కాలిఫోర్నియాలోని హాఫ్ మూన్ బే ప్రాంతంలో 2 చోట్ల దుండగులు కాల్పులు జరిపారు. ఈ ఘటనలో ఏడుగురు మృతిచెందారు. మరికొందరికి గాయాలైనట్లు తెలుస్తోంది. అటు అయోవాలోని డెస్ మోయిన్స్లోని ఓ స్కూల్లో కాల్పులు చోటు చేసుకున్నాయి. ఈ ఘటనలో ఇద్దరు విద్యార్థులు మృతి చెందగా.. ఓ ఉపాధ్యాయుడికి గాయాలయ్యాయి. ఘటనకు సంబంధించి పోలీసులు ముగ్గురిని అదుపులోకి తీసుకున్నారు.
కాగా.. రెండు రోజుల క్రితం కూడా అమెరికాలో అలాంటి ఘటనే జరిగింది. లాస్‌ఏంజెల్స్‌ సమీపంలోని మాంటేరీ పార్క్‌లో కాల్పులు చోటు చేసుకున్నాయి. శనివారం రాత్రి 10 గంటల సమయంలో ఓ వ్యక్తి విచక్షణా రహితంగా కాల్పులు జరిపాడు. చైనీయుల లూనార్‌ న్యూఇయర్‌ ఫెస్టివల్‌ వేడుకలు జరుగుతండగా.. ఈ ఘటన జరగడం తీవ్ర విషాదం నింపింది. కాల్పుల్లో సుమారు పది మంది వరకు మృతి చెంది ఉంటారని అధికారులు భావిస్తున్నారు. అయితే కాల్పులు చేపట్టిన వ్యక్తి సూసైడ్ చేసుకున్నట్లు వార్తలు వస్తున్నాయి.
