ఇండియా-చైనా సరిహద్దు గల్వాన్‌ వ్యాలీలో ఇరు దేశాల సైనికుల మ‌ధ్య జూన్ 15న జరిగిన ఘర్షణలో 20 మంది భారత సైనికులు మరణించిన విష‌యం తెలిసిందే. అయితే.. ఈ ఘర్షణలో చైనా సైనికులు కూడా 40 మంది వరకు చనిపోయినట్లు అంతర్జాతీయ మీడియాలో వార్త‌లు వ‌చ్చాయి. కానీ చైనా మాత్రం ఇప్ప‌టివ‌ర‌కూ ఈ విష‌యంపై నోరువిప్ప‌లేదు. అయితే.. తాజాగా ఓ సమాధి రాయి ఫోటో నెట్టింట్లో వైరల్‌గా మారింది. ఆ ఘర్షణలో చైనా సైనికులూ చ‌నిపోయార‌న్న‌దానికి ఈ స‌మాధే సాక్ష్య‌మ‌ని నెటిజ‌న్లు అంటున్నారు. చైనీస్‌ ఇంటర్నెట్‌ వీబో అకౌంట్‌లో సైనికుడి సమాధి రాయికి సంబంధించిన ఫోటో ప్రత్యక్ష‌మ‌వ‌డంతో ఆ ఫోటో మన దేశంలో వైర‌ల్ అయింది.
అయితే.. ఈ సమాధి చైనా సైనికుడు చెన్ జియాంగ్‌రాంగ్‌కు చెందినదిగా భావిస్తున్నారు. సమాధిపై మాండరిన్‌ భాషలో ‘69316 దళాల సైనికుడు, పింగ్నాన్, ఫుజియాన్ నుంచి’ అని రాసి ఉండ‌డం గ‌మ‌నార్హం. అంతేగాకుండా.. *చెన్ జియాంగ్రో సమాధి. జూన్ 2020లో భారత సరిహద్దు దళాలకు వ్యతిరేకంగా చేసిన పోరాటంలో ఆయన వీర‌మ‌ర‌ణం పొందారు. మరణానంతరం కేంద్ర సైనిక కమిషన్ జ్ఞాపకం చేసుకుంది* అని కూడా ఉంది. 2020 ఆగస్టు 5న దక్షిణ జిన్జియాంగ్ మిలిటరీ రీజియన్‌లో ఈ సమాధిని నిర్మించినట్లు ఫోటో చూపిస్తోంది. మరణించిన సైనికుడు 19 సంవత్సరాల వయస్సు వాడని.. అతడు 2001 డిసెంబర్‌లో జన్మించినట్లు సమాధి మీద రాసి ఉంది. అయితే దీనిపై ఇంకా చైనా అధికార యంత్రాంగం స్పందించలేదు.
