ఖలిస్థానీ సానుభూతిపరుడు హర్దీప్ సింగ్‌ నిజ్జర్‌ హత్య విషయంలో కెనడా- భారత్ మధ్య దౌత్యపరమైన ఉద్రిక్తత కొనసాగుతున్న విషయం తెలిసిందే. అయితే ఈ ఉద్రిక్తతలకు గల కారణం కెనడాకు భారత్ గురించి అమెరికా ఓ కీలక సమాచారం చేరవేయడమేనని కెనడాలోని అమెరికా రాయబారి డేవిడ్‌ కోహెన్ చెప్పారు. ఈ మేరకు న్యూయార్క్ టైమ్స్ ఓ కథనాన్ని ప్రచురించింది.
ఖలిస్థానీ సానుభూతిపరుడు హర్దీప్ సింగ్‌ నిజ్జర్‌ హత్య విషయంలో అమెరికా అందించిన సమాచారంతోనే భారత్పై కెనడా ప్రధాని ట్రూడో ఆరోపణలు చేశారని న్యూయార్క్ టైమ్స్ కథనం పేర్కొంది. ‘ఫైవ్‌ ఐయ్స్‌'(ఆస్ట్రేలియా, కెనడా, న్యూజిలాండ్‌, అమెరికా, యూకేలు భాగస్వాములుగా 1946లో ఫైవ్‌ ఐయ్స్‌ను స్థాపించారు.) దేశాల మధ్య జరిగిన నిఘా సమాచార మార్పిడి.. ట్రూడోను భారత్పై ఆరోపణలు చేయడానికి ప్రేరేపించిందని తెలిపింది. ఏ రకమైన సమాచారాన్ని కెనడాతో పంచుకున్నారో మాత్రం ఈ ఇంటర్వ్యూలో కోహెన్ చెప్పలేదు. అయితే కెనడా చేస్తున్న ఆరోపణలు నిజమైతే.. అంతర్జాతీయ నిబంధనలను భారత్ తీవ్రంగా ఉల్లంఘించినట్లే అవుతుందని కోహెన్ అభిప్రాయపడ్డారు.
