సాధారణంగా ఒక నిమ్మకాయ ధర రెండు నుంచి మూడు రూపాయలు ఉంటుంది. ఇక ప్రస్తుతం ధరలు ఆకాశాన్నంటుతున్న వేళ.. అది కూడా వేసవి కావడంతో ధర కాస్త పెరిగి ఐదు నుంచి పది రూపాయలు ఉంటుంది. కానీ ఓ చోట ఒక్క నిమ్మకాయ ధర అక్షరాల రూ.35 వేలు పలికింది. ఏంటి ఒక్క నిమ్మకాయకే అంత ధరా అని ఆశ్చర్యపోతున్నారా? ఆ నిమ్మకాయకు ఓ ప్రత్యేకత ఉంది మరి. అదేంటంటే?
తమిళనాడులోని ఈరోడ్‌ జిల్లా శివగిరి గ్రామంలోని శివాలయంలో ఈ నెల 8వ తేదీన శివరాత్రి మహోత్సవాన్ని ఘనంగా నిర్వహించారు. ఆ పరమేశ్వరుడికి ప్రత్యేక పూజలు చేశారు. ఈ పూజల సందర్భంగా ఆనవాయితీ ప్రకారం నిమ్మ, ఇతర ఫలాలు, సామగ్రిని శివుడికి సమర్పించారు. అనంతరం ఆ సామగ్రిని వేలం వేయగా.. ఇందులో మొత్తం 15 మంది పాల్గొన్నారు. ఈ క్రమంలోనే ఈరోడ్‌కు చెందిన ఓ భక్తుడు రూ.35 వేలకు నిమ్మకాయను దక్కించుకున్నాడు. వందలాది భక్తుల సమక్షంలో పూజలు నిర్వహించిన అనంతరం అతడికి అందజేసినట్లు ఆలయ వర్గాలు తెలిపాయి. నిమ్మకాయ దక్కించుకున్నవారికి ఆరోగ్యం, ఐశ్వర్యం సిద్ధిస్తుందని స్థానికుల విశ్వాసం.
