సాధారణంగా భారత్ నుంచి ఏదైనా విదేశాలకు వెళ్లాలంటే దాదాపుగా వీసా అవసరం. ఇక థాయ్లాండ్ టూరిస్ట్ కంట్రీస్కు మరీ తప్పనిసరి. కానీ ఇప్పుడు థాయ్లాండ్ సర్కార్ భారతీయ టూరిస్టులకు ఓ శుభవార్త చెప్పింది. ఆ దేశ పర్యాటక రంగాన్ని ప్రోత్సహించేందుకు.. మరింత మంది టూరిస్టులను ఆకర్షించేందుకు థాయ్లాండ్ సర్కార్ ఓ కీలక నిర్ణయం తీసుకుంది. ఇంతకీ ఆ నిర్ణయం ఏంటంటే..?
భారతదేశం నుంచి వచ్చే టూరిస్టులు వీసా లేకుండానే తమ దేశంలో 30 రోజులపాటు పర్యటించేందుకు అనుమతించాలని థాయ్ సర్కార్ నిర్ణయించింది. భారత్తో పాటు ఈ అవకాశం తైవాన్ దేశస్థులకు కూడా ఇచ్చింది. ఈ అవకాశం నవంబరు 10వ తేదీ నుంచి వచ్చే ఏడాది మే 10 వరకు ఉంది. ఈ గడువు లోపల ఈ రెండు దేశాల నుంచి టూరిస్టులు వీసా లేకుండా వచ్చే అవకాశాన్ని కల్పించింది. ఎక్కువ మంది పర్యాటకులను ఆకర్షించాలనే ఉద్దేశంతో థాయ్లాండ్ కేబినెట్‌ ఈ నిర్ణయం తీసుకున్నట్లు ఆ దేశ ప్రధాని శ్రేట్టా థవిసిన్‌ వెల్లడించారు. గత నెలలో చైనా నుంచి వచ్చే పర్యాటకులకు థాయ్లాండ్ వీసా మినహాయింపును ఇచ్చిన విషయం తెలిసిందే. సాధారణంగా మలేసియా, చైనా, దక్షిణ కొరియా తర్వాత భారత్ నుంచే ఎక్కువ మంది పర్యాటకులు థాయ్‌లాండ్‌కు వెళ్తుంటారు.
