ప్రస్తుతం దేశంలో ఎక్కడ చూసినా టమాటా పేరే వినిపిస్తోంది. ఏ సోషల్ మీడియా పేజ్ చూసినా టమాటా మీమ్సే కనిపిస్తున్నాయి. ఇక రోజురోజుకు పెరుగుతున్న ఈ కూరగాయ ధరలతో సామాన్యులు బెంబేలెత్తుతున్నారు. ఇక మేం కొనలేం బాబోయ్ అంటూ చేతులెత్తేస్తున్నారు. అయితే ఏ కష్టమొచ్చినా దేవుడితో చెప్పుకోవడం మనకున్న అలవాటే కదా. అలాగే తమిళనాడు నాగపట్టిణం జిల్లాలో టమాటా ధరల గోడును దేవుడికి విన్నవిస్తూ అక్కడి ప్రజలు ప్రత్యేక పూజలు నిర్వహించారు.
ప్రత్యేకం అంటే అలాంటిలాంటిది కాదు.. ఏకంగా 508 టమాటాలతో ఓ దండను తయారు చేసి.. దేవతా విగ్రహాలను అలంకరించారు. పూలు, నిమ్మకాయల మాలను సైతం దేవుళ్లకు సమర్పించుకున్నారు. మరియమ్మన్, నాగమ్మన్, మధురై వీరన్ స్వామికి ప్రత్యేక పూజలు నిర్వహించారు. ప్రజల సుఖశాంతులతో ఉండాలని, టమాటా ధరలు తగ్గాలని భక్తులు భగవంతులను వేడుకున్నారు.’ఆడి’ మాస పౌర్ణమి సందర్భంగా గరుకుడి పట్టణంలో ప్రత్యేక కార్యక్రమాలు చేపట్టారు భక్తులు. నాగపట్టిణం, తిరువారూర్, కారైకల్, మైలాడుతురై ప్రాంతాల నుంచి భక్తులు ఈ పూజలకు హాజరయ్యారు.
