ట్విటర్ మాజీ సీఈవో జాక్ డోర్సే భారత ప్రభుత్వంపై తీవ్ర ఆరోపణలు చేశారు. సాగు చట్టాలపై ఆందోళనల జరిగిన సమయంలో భారత ప్రభుత్వం నుంచి తమకు ఒత్తిడి ఎదురైందంటూ ఆరోపించారు. ఈ ఆరోపణలను కేంద్ర ప్రభుత్వం తీవ్రంగా ఖండించింది. డోర్సే చెబుతున్న విషయాలు పచ్చి అబద్ధాలని కేంద్ర సమాచార సాంకేతిక శాఖ మంత్రి రాజీవ్‌ చంద్రశేఖర్‌ కొట్టి పారేశారు. ట్విటర్ చరిత్ర నుంచి చాలా సందేహాస్పద కాలాన్ని తొలగించే ప్రయత్నంలో భాగంగానే ఆయన ఈ వ్యాఖ్యలు చేసి ఉంటారని రాజీవ్‌ ట్వీట్ చేశారు. భారత సార్వభౌమాధికారాన్ని అంగీకరించలేకే ఇలాంటి ఆరోపణలు చేస్తున్నారని మండిపడ్డారు.
ఇటీవల ఓ ఇంటర్వ్యూలో పాల్గొన్న డోర్సే.. ఏ ప్రభుత్వం నుంచైనా మీకు ఒత్తిడి ఎదురైందా అని యాంకర్ ప్రశ్నించగా.. భారత్ గురించి ఆయన ఉదాహరణగా చెప్పారు. భారత్లో సాగు చట్టాలపై రైతు ఆందోళనలు జరుగుతున్న క్రమంలో మోదీ సర్కారు నుంచి తీవ్ర ఒత్తిడి ఎదుర్కొన్నామని వెల్లడించారు. రైతులు, జర్నలిస్టుల అకౌంట్ల కంటెంట్ను తొలగించాలంటూ అనేక అభ్యంతరాలు పెట్టారని వివరించారు. ఒక దశలో ట్విట్టర్‌ను భారత్లో మూసేస్తామని కూడా బెదిరించినట్లు ఆయన ఆరోపించారు.
