ఏ ఉద్యోగానికి దరఖాస్తు చేసుకోవాలన్నా ఇప్పుడు వన్ టైం రిజిస్ట్రేషన్ తప్పనిసరి. ఒక్కసారి రిజిస్టర్ చేసుకుంటే చాలు.. ఎప్పుడైనా దరఖాస్తు చేసుకోవచ్చు. ఇప్పటివరకు టీఎస్ పీఎస్సీ వంటి రాష్ట్ర సర్వీసులకు మాత్రమే ఉన్న ఈ ఆప్షన్ ఇప్పుడు యూపీఎస్సీకి కూడా అమలు అవుతోంది. యూపీఎస్సీ ఉద్యోగార్థులకు మాత్రం ఇప్పటివరకు ఈ సదుపాయం లేకపోవడం వల్ల చాలా ఇబ్బందులు పడ్డారు. వాటిని దృష్టిలో పెట్టుకుని యూపీఎస్సీ కూడా తాజాగా ఓటీఆర్ను ప్రారంభించింది.
“వివిధ కేంద్ర ప్రభుత్వ విభాగాల్లో ఖాళీలను భర్తీ చేయడానికి యూపీఎస్సీ ఏడాది పొడవునా నిర్వహించే అనేక పరీక్షల కోసం పెద్ద సంఖ్యలో ఆశావహులు దరఖాస్తు చేసుకుంటారు. వారి సమయం ఆదా చేస్తూ, దరఖాస్తు ప్రక్రియను మరింత సులభతరం చేసేందుకు ఓటీఆర్ ప్లాట్ఫామ్ను ప్రవేశపెట్టాం. ఇక నుంచి యూపీఎస్సీలోని వివిధ రిక్రూట్మెంట్ పరీక్షలకు అప్లె చేసుకున్నప్పుడు ప్రతిసారీ ప్రాథమిక వివరాలు ఇవ్వాల్సిన పనిలేదు.” అని ఓ సీనియర్ యూపీఎస్సీ అధికారి తెలిపారు.
“ఉద్యోగార్థులు ఇచ్చిన ప్రాథమిక సమాచారాన్ని సర్వర్లలో సురక్షితంగా స్టోర్ చేస్తాం. వన్ టైమ్ రిజిస్ట్రేషన్ ప్రక్రియ ఉద్యోగార్థులకు చాలా ఉపయోగపడుతుంది. పొరపాటున కూడా తప్పుగా సమాచారం నమోదు అయ్యే అవకాశం ఉండదు. దరఖాస్తు ప్రక్రియను సులభతరం చేసే ఉద్దేశంతోనే అధికారిక వెబ్సైట్ upsc.gov.inలో వన్ టైమ్ రిజిస్ట్రేషన్ ప్లాట్ఫామ్ను ప్రారంభించాం. ఓటీఆర్ సూచనలను పరిశీలించి, భవిష్యత్తులో ఎలాంటి సమస్యలు తలెత్తకుండా ఉండేందుకు మొదటిసారి రిజిస్టర్ చేసుకునేటప్పుడు జాగ్రత్త వహించాలి.” అని యూపీఎస్సీ తెలిపింది.
