శని గ్రహం పేరు వినగానే చాలామందికి భయం, అశుభం గుర్తుకొస్తాయి. కష్టాలు, ఆటంకాలకు శని కారకుడని భావిస్తారు. కానీ, నిజానికి శని కేవలం శిక్షించే గ్రహం మాత్రమే కాదు, ‘కర్మఫల ప్రదాత’గా, న్యాయమూర్తిగా కూడా వ్యవహరిస్తాడు. శని ప్రభావం ఎప్పుడూ చెడుగా ఉండదు. మనం చేసిన కర్మలను బట్టి, శని మన జీవితంలో అద్భుతమైన మార్పులను తీసుకువస్తాడు. శని గురించి మనకున్న అపోహలు, దాని నిజమైన ప్రభావం గురించి తెలుసుకుందాం.
జ్యోతిష్య శాస్త్రంలో శనిని కఠినమైన గురువుగా పరిగణిస్తారు. శని ప్రభావం, ముఖ్యంగా ఏలినాటి శని, అర్ధాష్టమ శని, అష్టమ శని వంటి దశలలో జీవితంలో అడ్డంకులు, ఆలస్యం, నష్టాలు, ఆరోగ్య సమస్యలు వంటి కష్టాలను కలిగిస్తాడు. ఈ కారణంగానే శని అంటే భయపడతారు. అయితే శని ఇచ్చే కష్టాలు శిక్షల కోసం కావు, మనల్ని మనం మెరుగుపరుచుకోవడానికి, జీవిత పాఠాలు నేర్చుకోవడానికి మాత్రమే.
ఈ దశలో మనం సహనం క్రమశిక్షణ, కష్టపడే తత్వం నిజాయితీ వంటి లక్షణాలను అలవర్చుకోవాలని శని కోరుకుంటాడు. శని ప్రభావం ముగిసే నాటికి, ఆ వ్యక్తి పరిణతి చెంది మరింత బాధ్యతాయుతంగా తయారవుతారు. శని బలం పొందినప్పుడు లేదా శుభ స్థానంలో ఉన్నప్పుడు ఆ వ్యక్తికి గొప్ప పదవులు, అంతులేని సంపద పేరు ప్రఖ్యాతులు, న్యాయపరమైన విజయాలు చేకూరుతాయి.
శని ధర్మాన్ని, న్యాయాన్ని నిలబెట్టేవారికి అద్భుతమైన యోగాన్ని ప్రసాదిస్తాడు. అందుకే శని ప్రభావం చెడుది కాదు, అది ఒక కర్మ చక్రం. మనం ఎలాంటి కర్మలు చేస్తామో, దానికి అనుగుణంగానే శని మనకు ఫలితాలను ఇస్తాడు.
గమనిక: శని ప్రభావం మరియు దాని ఫలితాలు అనేవి వ్యక్తిగత జాతకం లో శని స్థానం, ఇతర గ్రహాలతో దాని సంబంధం, అలాగే జరుగుతున్న దశలు మరియు కర్మలపై ఆధారపడి ఉంటాయి.
