ఖమ్మం నగరంలో టీడీపీ అధినేత చంద్రబాబు ఆ పార్టీ శంఖారావం బహిరంగ సభను ప్రారంభించారు. నగరంలోని సర్దార్ పటేల్ మైదానంలో జరుగతున్న ఈ సభకు పెద్ద ఎత్తున నేతలు, కార్యకర్తలు తరలివచ్చారు. టీడీపీ సభకు ప్రజలందరూ స్వచ్ఛందంగా వచ్చారని చంద్రబాబు అన్నారు. పసుపు రంగు జెండా పట్టుకుని టీడీపీ రుణం తీర్చుకుంటామని యువత ముందుకొచ్చారని వ్యాఖ్యానించారు. తమ భవిష్యత్తుకు బంగారు బాటలు వేశానని చిన్నారులు జేజేలు పలికారని తెలిపారు.
“నేను కోరుకున్నది అధికారం కాదు.. మీ అభిమానం. మీ ఆత్మబంధువుగా ఉండాలని నేను కోరుకుంటున్నాను. టీడీపీ 40 ఏళ్లు పూర్తి చేసుకుంది. ప్రజాజీవితంలో 40 ఏళ్లు పూర్తి చేసుకుని భవిష్యత్తుకు నాంది పలకబోతున్నాం. ఎన్టీఆర్ శత జయంతి ఉత్సవాలు నిర్వహించుకుంటున్నాం. నందమూరి తారక రామారావు వ్యక్తి కాదు.. ఒక శక్తి. చిరకాలం తెలుగు వారి గుండెల్లో ఉండే ఏకైక నాయకుడు ఎన్టీఆర్.” అని టీడీపీ నేత చంద్రబాబు నాయుడు అన్నారు.
