హైదరాబాద్లో మరోసారి రేవ్ పార్టీ కలకలం రేపింది. మాదాపూర్లో రేవ్ పార్టీని యాంటీ నార్కోటిక్స్ బ్యూరో అధికారులు భగ్నం చేశారు. భారీగా డ్రగ్స్ స్వాధీనం చేసుకున్నారు. ఈ రేవ్ పార్టీలో వందల మంది డ్రగ్స్ సేవిస్తున్నట్లు అధికారులు గుర్తించారు. వారిని అదుపులోకి తీసుకున్నారు. వీరిలో సినీ నిర్మాత సహా ఐదుగురు ప్రముఖులు ఉన్నారు. వారందరిని మాదాపూర్ పోలీసులకు అప్పగించారు.
‘మాదాపూర్లో రేవ్ పార్టీ నిర్వహిస్తున్నట్లు మాకు సమాచారం వచ్చింది. సమాచారం అందగానే మేం వారిని రెడ్ హ్యాండెడ్గా పట్టుకోవాలని మా టీమ్స్ను సిద్ధం చేశాం. రేవ్ పార్టీ ప్రారంభం కాగానే మేం దాడి చేశాం. అప్పటికే చాలా మంది మత్తులో తేలిపోతున్నారు. ఈ పార్టీలో భారీగా డ్రగ్స్ స్వాధీనం చేసుకున్నాం. అవి ఎక్కడి నుంచి వచ్చాయో ఆరా తీస్తున్నాం. పార్టీ నిర్వాహకులను అదుపులోకి తీసుకున్నాం. అలాగే నిందితుల్లో ఓ సినీ నిర్మాత మరో ఐదుగురు ప్రముఖులు ఉన్నారు. వాళ్లను మాదాపూర్ పోలీసులకు అప్పగించాం.’ అని యాంటీ నార్కోటిక్స్ అధికారి ఒకరు తెలిపారు.
