హైదరాబాద్లో చినుకు పడితే చిత్తడే. ఇక భారీ వర్షాలు కురిస్తే రహదారుల పరిస్థితి అంతే. వర్షం కురిసినప్పుడు కనుక బయటకు వస్తే.. మళ్లీ ఇంటికి చేరే వరకు ఏ అర్ధరాత్రో అవ్వడం ఖాయం. ఎందుకంటే అంతలా ఉంటుంది హైదరాబాద్ ట్రాఫిక్ రద్దీ. సాధారణంగా మామూలుగా ఉండదు ట్రాఫిక్ జామ్. ఇక వర్షాలు తోడైతే.. గంటలు గంటలు రోడ్లపై ఎదురుచూపులు తప్పవు. ఈ క్రమంలోనే వర్షాల నేపథ్యంలో హైదరాబాద్ పోలీసు యంత్రాంగం కీలక నిర్ణయం తీసుకుంది.
భారీ వర్షాల నేపథ్యంలో ఐటీ కారిడార్‌లో కంపెనీలకు ప్రత్యేక లాగౌట్ను ఇటీవల సైబరాబాద్ సీపీ సూచించిన విషయం తెలిసిందే. అయితే తాజాగా ఆ స్పెషల్ లాగౌట్ సమయాన్ని మరో 2 వారాలు పొడిగిస్తున్నట్లు సీపీ స్టీఫెన్‌ రవీంద్ర ప్రకటించారు. భారీ వర్షాల దృష్ట్యా వివిధ ప్రాంతాల్లో పరిస్థితులు, సహాయ చర్యలపై కమిషనరేట్‌లోని పబ్లిక్‌ సేఫ్టీ ఇంటిగ్రేటెడ్‌ ఆపరేషన్‌ సెంటర్‌(పీఎస్‌ఐవోసీ)లో సమీక్షించారు. సీసీ కెమెరాల ద్వారా కొన్ని చెరువుల్లో ప్రవాహ తీరు పరిశీలించారు.
