తెలుగు రాష్ట్రాల్లో సంక్రాంతి సందడి షురూ అయింది. పండుగకు మరో వారం రోజులు ఉన్నా అప్పుడే కోలాహలం మొదలైంది. ఇప్పటికే భాగ్యనగర వాసులు సొంతూళ్లకు పయనమవుతున్నారు. మరో రెండు మూడ్రోజుల్లో సంక్రాంతి సెలవులు కూడా షురూ అవుతాయి. ఈ నేపథ్యంలో అప్పుడే పలు చోట్ల కోడి పందేలు మొదలయ్యాయి. అయితే ఇది ఏపీలో కాదండోయ్. తెలంగాణలో ఈ కోడి పందేలు జోరుగా సాగుతున్నాయి.
సంక్రాంతి పండుగను కుమురం భీం ఆసిఫాబాద్ జిల్లా వాంకిడి మండలం ఏజెన్సీ ప్రాంతాల్లో పందేలు జోరుగా సాగుతున్నాయి. పోలీసు అధికారుల హెచ్చరికలను బేఖాతరు చేస్తూ ఈ పందేలు జరుపుతున్నారు. వెల్గి గ్రామ పంచాయతీ శివారులోని ఖాళీ స్థలాల్లో పందేలు ఏర్పాటు చేయగా.. కోళ్ల యజమానులతో పాటు పలు గ్రామాలకు చెందిన వ్యక్తులు కూడా పందేలు కాస్తున్నారు.
ఈ సందర్భంగా పెద్ద మొత్తంలో నగదు చేతులు మారుతున్నట్లు సమాచారం. అయితే కోడి పందేలు ఒకేచోట కాకుండా పలుచోట్ల కూడా నిర్వహిస్తున్నట్లు తెలుస్తోంది. పొలాలను అడ్డుగా చేసుకుని నిర్వాహకులు కోడి పందేలు నిర్వహిస్తున్నట్లు సమాచారం.
