తెలంగాణలో సర్కార్ నౌకరీ కోసం ప్రయత్నించే నిరుద్యోగులకు రాష్ట్ర ప్రభుత్వం తీపికబురు చెప్పింది. యూనిఫాం సర్వీసులు మినహా, ఇతర ప్రభుత్వ ఉద్యోగాలకు ప్రస్తుతం ఉన్న గరిష్ఠ వయో పరిమితిని 44 నుంచి 46 ఏళ్లకు పెంచుతున్నట్లు తెలిపింది. ఈ వయో పరిమితి పెంపు రెండేళ్ల పాటు అమల్లో ఉంటుందని స్పష్టం చేసింది. ఈ మేరకు ఈ నెల 8వ తేదీన ప్రభుత్వ ప్రధాన కార్యదర్శి శాంతి కుమారి ఉత్తర్వులు జారీ చేశారు.
రాష్ట్రంలో ప్రభుత్వ ఉద్యోగాలకు గరిష్ఠ వయో పరిమితి గతంలో 34 ఏళ్లుగా ఉండగా.. తెలంగాణ రాష్ట్ర ఆవిర్భావం తరువాత 2015లో ఈ పరిమితిని 10 ఏళ్లు పొడిగిస్తూ 44 ఏళ్లుగా ఖరారు చేశారు. ఆ ఉత్తర్వు రెండేళ్ల వరకు అమల్లో ఉంటుందని నాడు పేర్కొన్నగా.. ఆ తరువాత 2022లో మరోసారి గరిష్ఠ వయోపరిమితి 44 ఏళ్లుగా ప్రభుత్వం ఖరారు చేసింది. దీన్ని మరింత సడలించాలని నిరుద్యోగుల నుంచి విజ్ఞప్తులు వచ్చాయి. దీంతో మరో రెండేళ్ల సడలింపు ఇవ్వాలంటూ టీఎస్‌పీఎస్సీ కార్యదర్శి ఈ నెల 3వ తేదీన ప్రభుత్వానికి లేఖ రాశారు. ఈ నేపథ్యంలో సర్కారు కొలువులకు గరిష్ఠ వయోపరిమితిని 44 నుంచి 46 ఏళ్లకు పెంచుతూ ప్రభుత్వం ఉత్తర్వులు ఇచ్చింది.
