ఓటుకు నోటు కేసులో గత పదేళ్లు పాలించిన బీఆర్ఎస్, ప్రస్తుతం అధికారంలో ఉన్న బీజేపీ ఎందుకు ఏం చేయలేక పోయాయని మంత్రి పొన్నం ప్రభాకర్ ప్రశ్నించారు. ఓటుకు నోటు కేసు పాత చింతకాయ పచ్చడి అని ప్రస్తుతం ఫోన్ ట్యాపింగ్ కేసు ట్రెండింగ్ అని అన్నారు. ఫోన్ ట్యాపింగ్, ఓటుకు నోటు కేసులపై చర్చకు సిద్ధమా అంటూ బీఆర్ఎస్, బీజేపీలకు సవాల్ విసిరారు.
కరీంనగర్ అంబేడ్కర్ స్టేడియంలో ఆ నియోజకవర్గం టికెట్ ఆశిస్తున్న వెలిచార రాజేందర్తో కలిసి ఎన్నికల ప్రచారం నిర్వహించిన నంత్రి పొన్నం బీజేపీ అభ్యర్థి బండి సంజయ్ పై తీవ్రంగా ఫైర్ అయ్యారు. ప్రచారంలో తన తల్లి ప్రస్తావన తీసుకువచ్చి, సెంటిమెంట్తో ఓట్లు పొందేందుకు బండి యత్నిస్తున్నారని ఆగ్రహం వ్యక్తం చేశారు.
‘రాజకీయాలకు సంబంధం లేని తల్లి గురించి ప్రచారంలో ప్రస్తావించడం సరికాదు. ప్రతిసారి ఎన్నికల ముందు ఏదో ఒక విషయాన్ని తీసుకువచ్చి, ఓట్లు పొందేందుకు ప్రయత్నిస్తున్నారు. కరీంనగర్లో వినోద్రావును ఓడించడానికి బండి సంజయ్, గంగుల కమలాకర్కు మధ్య చీకటి ఒప్పందాలు అయ్యాయి.’ అని పొన్నం ఆరోపించారు.
