తెలంగాణ శాసనసభ ఎన్నికల ఓట్ల లెక్కింపు ప్రశాంతంగా కొనసాగుతోంది. ఇప్పటికే బ్యాలెట్, సర్వీస్ ఓట్ల లెక్కింపు ముగింపు దశకు వచ్చింది. ఈ ఓట్లలో దాదాపు చాలా చోట్ల కాంగ్రెస్ పార్టీ ఆధిక్యంలో కనిపిస్తోంది. హస్తం అభ్యర్థులు మెజార్టీతో ముందంజలో కొనసాగుతున్నారు. కామారెడ్డి నియోజకవర్గంలో రేవంత్ రెడ్డి ఆధిక్యంలో ఉన్నారు. రెండో స్థానంలో సీఎం కేసీఆర్ కొనసాగుతున్నారు. అయితే ఈ నియోజకవర్గం రాష్ట్ర వ్యాప్తంగా ఆసక్తి రేకెత్తిస్తున్న విషయం తెలిసిందే.
కామారెడ్డి నియోజకవర్గంలో బీఆర్ఎస్ అభ్యర్థిగా సీఎం కేసీఆర్ పోటీ చేస్తున్న విషయం తెలిసిందే. గజ్వేల్తో పాటు కామారెడ్డిలోనూ ఆయన బరిలోకి దిగారు. అయితే కేసీఆర్ను ఎలాగైనా ఓడించాలని కంకణం కట్టుకున్న కాంగ్రెస్ పార్టీ.. ఆయనకు వ్యతిరేకంగా తమ పార్టీ నుంచి రేవంత్ రెడ్డిని బరిలోకి దింపింది. ఇక రేవంత్ కొడంగల్తో పాటు కామారెడ్డిలో కేసీఆర్కు గట్టి పోటీనిచ్చారు. వరుస సభలు, సమావేశాలు, రోడ్ షోలు నిర్వహిస్తూ భారీగా ప్రచారం నిర్వహించారు. కేసీఆర్ హయాంలో రైతులు తీవ్రంగా నష్టపోతున్నారనే విషయాన్ని బలంగా ప్రజల్లోకి తీసుకెళ్లే ప్రయత్నం చేశారు. ఇక ఇప్పుడు కామారెడ్డి నియోజకవర్గం ఓట్ల లెక్కింపులో కేసీఆర్ను దాటేసి ముందంజలో కొనసాగుతున్నారు.
