ఈ ఏడాదిలో తొలి ఆరు నెలల్లో తెలంగాణకు రూ.9,679 కోట్ల విదేశీ ప్రత్యక్ష పెట్టుబడులు(ఎఫ్డీఐ) వచ్చాయి. కేంద్ర వాణిజ్యశాఖ పరిధిలోని డిపార్ట్‌మెంట్‌ ఫర్‌ ప్రమోషన్‌ ఆఫ్‌ ఇండస్ట్రీ అండ్‌ ఇంటర్నల్‌ ట్రేడ్‌ (డీపీఐఐటీ) డేటా ఈ విషయాన్ని వెల్లడించింది. ఎఫ్డీఐలను ఆకర్షించడంలో ఏప్రిల్ నుంచి సెప్టెంబర్ వరకు దేశంలో తెలంగాణ 6వ స్థానంలో నిలిచింది. ఇందులో ఆంధ్రప్రదేశ్‌ 11వ స్థానాన్ని దక్కించుకుంది. ఏపీకి కేవలం రూ.630 కోట్లు మాత్రమే వచ్చాయి.
కేంద్ర ప్రభుత్వం 2019 అక్టోబరు నుంచి దేశంలోకి వస్తున్న ఎఫ్డీఐలను రాష్ట్రాల వారీగా విభజించి చూపుతుండగా.. ఈ ఏడాది ఏప్రిల్-సెప్టెంబరు మధ్యకాలంలో దేశవ్యాప్తంగా అన్ని రాష్ట్రాలకూ కలిపి రూ.1,68,875.46 కోట్ల పెట్టుబడులు వచ్చినట్లు డేటాలో వెల్లడైంది. ఇందులో మహారాష్ట్ర, దిల్లీ, కర్ణాటక, గుజరాత్‌, తమిళనాడు తొలి 5 స్థానాల్లో ఉన్నాయి.
దేశానికి వచ్చిన మొత్తం విదేశీ పెట్టుబడుల్లో తొలి 5 రాష్ట్రాల వాటా రూ.1,44,544.11 కోట్ల (85.59%) మేర ఉండగా.. మొత్తం పెట్టుబడుల్లో తెలంగాణకు 5.73% వాటా దక్కగా, ఆంధ్రప్రదేశ్‌ వాటా కేవలం 0.37%కి పరిమితమైంది.
