నిరుద్యోగులకు అలర్ట్. ప్రభుత్వ విభాగాల్లో 563 గ్రూప్ – 1 సర్వీసు పోస్టుల భర్తీకి జారీచేసిన ఉద్యోగ ప్రకటన దరఖాస్తు గడువు ఈరోజుతో ముగియనుంది. ఫిబ్రవరి 23వ తేదీ నుంచి టీఎస్పీఎస్సీ ఆన్‌లైన్లో దరఖాస్తులు స్వీకరిస్తున్న విషయం తెలిసిందే. ఈనెల 14వ తేదీ అంటే ఇవాళ సాయంత్రం 5 గంటల్లోగా దరఖాస్తు చేసుకోవాలని గడువు విధించింది.
గతంలో దరఖాస్తు చేసిన అభ్యర్థులు మరోసారి చేయాలని టీఎస్పీఎస్సీ సూచించింది. కొత్తగా విద్యార్హత పొందిన ఉద్యోగార్థులు పోస్టులకు దరఖాస్తు చేసుకోవచ్చని కమిషన్‌ పేర్కొంది. అయితే బుధవారం వరకు 2.70 లక్షల దరఖాస్తులు వచ్చినట్లు టీఎస్పీఎస్సీ తెలిపింది. 2022లో జారీ చేసిన గ్రూప్ – 1 నోటిఫికేషన్‌కు 3.80 లక్షల మంది అప్లై చేశారు. గతంలోనూ చివరి రోజున భారీ సంఖ్యలో అభ్యర్థులు దరఖాస్తు చేశారు. ఈసారి కూడా అలాగే జరగవచ్చని టీఎస్పీఎస్సీ అంచనా వేస్తోంది. గ్రూప్-1 ప్రిలిమ్స్ పరీక్షను జూన్ 9న, మెయిన్స్ అక్టోబర్ 21నుంచి నిర్వహించనున్నట్టు టీఎస్పీఎస్సీ ఇప్పటికే ప్రకటించిన విషయం తెలిసిందే.
