ఎట్టకేలకు తెలంగాణ సింగరేణి సంస్థలో ఎన్నికల సైరన్‌ మోగింది. సింగరేణి కాలరీస్ సంస్థ గుర్తింపు కార్మిక సంఘం ఎన్నికలను వచ్చే నెల 28వ తేదీన నిర్వహించనున్నారు. ఈ క్రమంలో ఎన్నికల అధికారి, కేంద్ర కార్మిక శాఖ డిప్యూటీ చీఫ్‌ లేబర్‌ కమిషనర్‌ డి.శ్రీనివాసులు ఎన్నికల షెడ్యూలు విడుదల చేశారు. అదే రోజు ఓట్ల లెక్కింపు జరిపి ఫలితాలు ప్రకటిస్తామని వెల్లడించారు.
సింగరేణి సంస్థ ఎన్నికల షెడ్యూల్ వివరాలు..
- ముసాయిదా ఓటర్ల జాబితాను ఈ నెల 30వ తేదీన కార్మిక సంఘాలకు, యాజమాన్యానికి అందజేస్తారు.
- వచ్చే నెల 3వ తేదీ వరకు అభ్యంతరాలు స్వీకరిస్తారు.
- అక్టోబర్ 5వ తేదీన ఓటర్ల తుది జాబితా ప్రదర్శిస్తారు.
- వచ్చే నెల 6వ తేదీ ఉదయం 10 నుంచి 7వ తేదీ సాయంత్రం 5 వరకు నామినేషన్లు స్వీకరిస్తారు.
- అక్టోబర్ 9న ఉ. 10 నుంచి సా.5 వరకు నామినేషన్ల ఉపసంహరణకు అవకాశం ఉంది.
- అర్హులైన అభ్యర్థులకు 10వ తేదీ మధ్యాహ్నం ఎన్నికల గుర్తులు కేటాయిస్తారు.
- 28వ తేదీన ఉదయం 7 నుంచి సాయంత్రం 5 వరకు పోలింగ్‌ జరుగుతుంది.
- అదే రోజు రాత్రి 7 గంటల నుంచి ఓట్ల లెక్కింపు జరిపి ఫలితాలు ప్రకటిస్తారు.
