కాఫీలు తాగారా.. టిఫినీలు తిన్నారా అంటూ తెల్లవారు జామునే నోటిఫికేషన్ పంపుతూ వంట చేసుకునే వాళ్లని కూడా తన ఆఫర్లతో ఊరిస్తూ ఫుడ్ ఆర్డర్ చేసుకునేలా ప్రేరేపించే ప్రముఖ ఫుడ్ డెలివరీ యాప్ జొమాటో తన యూజర్లకు బ్యాడ్ న్యూస్ చెప్పింది. తన ప్రో మెంబర్ షిప్ ను నిలిపివేసింది. ఈ ప్లాన్‌ను రెన్యువల్‌ చేసుకోవడానికి గానీ.. కొత్తగా కొనుగోలు చేయడానికి వీలు పడకపోవడంతో కొందరు యూజర్లు సామాజిక మాధ్యమాల్లో ఫిర్యాదు చేశారు. ఓ యూజర్‌ ఫిర్యాదుపై కంపెనీ స్పందిస్తూ.. ప్రో ప్రోగ్రామ్‌ ఇక అందుబాటులో ఉండదని పేర్కొంది. అదే సమయంలో కొత్త ప్రోగ్రామ్‌పై పనిచేస్తున్నట్లు తెలిపింది. దీన్ని త్వరలోనే అందుబాటులోకి తీసుకురానున్నట్లు పేర్కొంది. ఇప్పటికే జొమాటో ప్రో+కు ఆ కంపెనీ గుడ్‌బై చెప్పింది.
జొమాటో గోల్డ్‌ మెంబర్ షిప్ స్ఠానంలో జొమాటో ప్రోను 2020లో కంపెనీ లాంచ్‌ చేసింది. 2021లో ప్రో+ ప్రోగ్రామ్‌ను తీసుకొచ్చింది. జొమాటో ప్రో సబ్‌స్క్రిప్షన్‌ తీసుకున్న వారికి ఆన్‌లైన్‌లో ఫుడ్ డెలివరీ, డైనింగ్‌పై డిస్కౌంట్లు లభిస్తాయి. అయితే, యాక్టివ్ మెంబర్లు మాత్రం యథావిధిగా ప్రో ప్రయోజనాలను పొందొచ్చని కంపెనీ పేర్కొంది. అలాగే ఆర్‌బీఎల్‌ బ్యాంక్‌తో కలిసి జారీ చేసిన కో బ్రాండెడ్‌ క్రెడిట్‌ కార్డు ద్వారా లభించే క్యాష్‌బ్యాక్‌పై పరిమితి విధించాలని జొమాటో నిర్ణయించింది. అదే సమయంలో బ్లింకిట్‌ యాప్‌లో కొనుగోళ్లకు కూడా క్యాష్‌బ్యాక్‌ స్కీమ్‌ను వర్తింపజేయాలని నిర్ణయించింది. ఆన్‌లైన్‌ నుంచి ఆఫ్‌లైన్‌పై దృష్టి సారించడంలో భాగంగానే జొమాటో ఈ నిర్ణయం తీసుకుందని భావిస్తున్నారు.
జొమాటో తీసుకున్న తాజా నిర్ణయంపై కొందరు పెదవి విరుస్తున్నారు. ప్రో మెంబర్ షిప్‌ను మిస్‌ అవుతున్నామని.. ‘జొమాటో ప్రో RIP’ అంటూ కామెంట్లు పెడుతున్నారు. ఈ ప్రోగ్రామ్‌ తీసేస్తే తాము స్విగ్గీకి మారుతామంటూ ఇంకొందరు పోస్ట్‌చేయగా.. కొత్త ప్రోగ్రామ్‌ పట్ల ఆసక్తిగా ఉన్నట్లు మరికొందరు కామెంట్లు పెట్టారు.
