తమిళనాడులో ఘోరం జరిగింది. అక్కడ ఒక భారీ అగ్ని ప్రమాదం సంభవించింది. ఆ అగ్ని ప్రమాదంలో మంటలు ఆర్పేందుకు వెళ్ళిన ఇద్దరు ఫైర్ సిబ్బంది ప్రాణాలు కోల్పోయారు. మదురైలోని సౌత్ మాసి రోడ్‌లోని ఒక వస్త్ర దుకాణంలో నిన్న అర్ధరాత్రి మంటలు చెలరేగాయి. కొద్దిసేపటి తరువాత మంటలు వేగంగా వ్యాపించి ఆ ప్రాంతమంతా దట్టమైన పొగతో నిండిపోయింది. ఇది తెలుసుకున్న అగ్నిమాపక సిబ్బంది సంఘటన స్థలానికి చేరుకుని మంటలను ఆర్పేందుకు తీవ్ర ప్రయత్నాలు చేశారు.
అప్పుడు, భవనం అకస్మాత్తుగా కూలిపోయింది. ఈ క్రమంలో అగ్నిమాపక సిబ్బంది శివరాజన్, కృష్ణమూర్తి శిథిలావస్థలో చిక్కుకుని తీవ్రంగా గాయపడ్డారు. వెంటనే వారిని ఆసుపత్రికి తరలించారు. కానీ ఇద్దరూ చికిత్స పొందుతూ మరణించారు. ఈ వస్త్ర దుకాణం ఉన్న భవనం చాలా పాతదని, మంటలు చెలరేగడంతో భవనం కూలిపోయి, ప్రాణనష్టం జరిగిందని చెబుతున్నారు. ఏదేమైనా ఇద్దరు ఫైర్ ఫైటర్స్ ఇలా మరణించడం, అది కూడా పండుగ పూట అంటే చాలా బాధ కలిగించే అంశం అనే చెప్పాలి.
