కోవిడ్ టీకా తీసుకున్న తరువాత కొందరు చనిపోతున్న విషాదకర వార్తలతో అనేక భయాందోళనలు నెలకొన్నాయి. దీంతో వ్యాక్సిన్ తీసుకునేందుకు చాలా మంది వెనకాడుతున్నారు. ఈ నేపథ్యంలో ఇండియన్ కౌన్సిల్ ఆఫ్ మెడికల్ రీసెర్చ్ ఐసిఎంఆర్ సంచలన డేటా విడుదల చేసింది.
కోవాక్సిన్ రెండు మోతాదులు తీసుకున్న వారిలో దాదాపు 0.04 శాతం మంది మాత్రమే కోవిడ్ -19 కు పాజిటివ్ సోకినట్లు కేంద్ర ప్రభుత్వం మంగళవారం తెలిపింది. అలాగే కోవిషీల్డ్ యొక్క రెండు మోతాదులు తీసుకున్న తర్వాత 0.03 శాతం మందికి పాజిటివ్ అని తేలింది. సంక్రమణ పురోగతిపై ఈ డేటాను ఇండియన్ కౌన్సిల్ ఆఫ్ మెడికల్ రీసెర్చ్ (ఐసిఎంఆర్) విడుదల చేసింది. అంటే కరోనా వ్యాక్సిన్ వేసిన తరువాత ప్రజలు వ్యాధి బారిన పడుతున్నప్పటికీ వ్యాధి తీవ్రంకాకుండా నిరోధిస్తుందని ఐసీంఆర్‌ డేటా తేల్చంది.
