టీఆర్ఎస్ సర్కార్ బీజేపీ నేతలు ఫోన్లు ట్యాపింగ్ చేస్తోందని ఆ పార్టీ నేతలు ఆరోపించారు. రాష్ట్ర ప్రధాన ఎన్నికల అధికారి వికాస్రాజ్ను కలిసి ఈ విషయంపై ఫిర్యాదు చేశారు. మునుగోడు ఉపఎన్నికలో బీజేపీని, పార్టీ అభ్యర్థి రాజగోపాల్రెడ్డిని బద్నాం చేసే ఉద్దేశంతో టీఆర్ఎస్ నకిలీ బ్యాంకు ఖాతాలు సృష్టించినట్లు బీజేపీ నేతలు ఆరోపించారు. సీఈవోను కలిసిన కాషాయ బృందం టీఆర్ఎస్ పార్టీ రాజగోపాల్రెడ్డిపై ఈసీకి ఇచ్చిన ఫిర్యాదుపై వివరణ ఇచ్చారు. ఫిర్యాదులో పేర్కొన్న ఖాతాలకు సుశీ ఇన్ఫ్రా నుంచి ఎలాంటి లావాదేవీలు జరగలేదని వారు స్పష్టం చేశారు.
ఉపఎన్నికలో టీఎన్జీవో నేతలు బహిరంగంగా టీఆర్ఎస్ పార్టీకి వత్తాసు పలుకుతున్నారని వారిపై చర్యలు తీసుకోవాలని బీజేపీ నాయకులు ఈసీకి ఫిర్యాదు చేశారు. టీఎన్జీవో అధ్యక్షుడు రాజేందర్‌ సహా నేతలపై ప్రభుత్వం క్రమశిక్షణా చర్యలు తీసుకోవాలని కోరారు. అవసరమైతే న్యాయస్థానాన్ని కూడా ఆశ్రయిస్తామని చెప్పారు.
“టీఎన్జీవో నేతలు బహిరంగంగా ఎన్నికల్లో ఫలనా పార్టీకి మీరు మద్దతుగా పనిచేయండి అని చెప్పుతున్నారు. ప్రభుత్వ ఉద్యోగులు ఇలా చేయడం సర్వీస్‌ రూల్స్‌కి విరుద్ధం.. అవసమైతే వారిపై క్రిమినల్‌ కేసులు కూడా పెడతాం.. మన దేశంలో బ్యాంకింగ్ రంగం చాలా సెక్యూరిటీతో కూడుకుంది. ఖాతాదారు అనుమతి లేకుండా ఏ బ్యాంక్ కూడా వారి వ్యక్తిగత సమాచారం ఇవ్వదు. అలాంటింది బయట వ్యక్తులకు ఎలా సమాచారం వెళ్లింది.. ఏ బ్యాంక్ నుంచి సమాచారం వెళ్లింది.. అనేదానిపై ఆరాతీస్తున్నాం.. వారిపై కూడా ఈసీకి ఫిర్యాదు చేశాం.”- ప్రకాశ్‌ రెడ్డి, బీజేపీ సీనియర్‌ నేత
