పంజాబ్-హరియాణా హైకోర్టు, చండీగఢ్ జిల్లా కోర్టు, పంచకూల కోర్టుల్లో బాంబులు కలకలం రేపాయి. ఈ కోర్టుల్లో బాంబులు ఉన్నాయంటూ వచ్చిన లేఖలు స్థానికంగా హంగామా సృష్టించాయి. కోర్టుల్ని పేల్చేస్తామని ఆ లేఖలో రాసి ఉన్నట్లు అధికారులు పేర్కొన్నారు. న్యాయమూర్తి కాంప్లెక్స్లో బాంబు పెట్టామని.. అది మధ్యాహ్నం ఒంటి గంటకు పేలుతుందని చెప్పారు. బాంబు సమాచారం అందుకున్న పంచకూల పోలీసులు అప్రమత్తమయ్యారు. బాంబు డిస్పోజల్ స్క్వాడ్, డాగ్ స్క్వాడ్ ఘటనా స్థలానికి చేరుకున్నాయి.
అనంతరం కోర్టు పరిసరాల్లో ఉన్నవారందరినీ బయటకు పంపించి.. తమ ఆధీనంలోకి తీసుకున్నారు పోలీసులు. కాగా, బాంబు బెదిరింపు లేఖ తమకు వచ్చిందని ఏసీపీ సురేంద్ర యాదవ్ చెప్పారు. ఈ ఘటనపై కేసు నమోదు చేసుకున్న పోలీసులు దర్యాప్తు ప్రారంభించారు.
బాంబు కోసం పోలీసులు గాలింపు చర్యలు చేపట్టారు. గణతంత్ర దినోత్సవం నేపథ్యంలో ఈ ఘటన జరగడం భయాందోళనలకు గురిచేస్తోంది. మొదట మాక్ డ్రిల్స్ అని చెప్పిన పోలీసులు.. తర్వాత బాంబు బెదిరింపు లేఖ వచ్చినట్లు తెలిపారు.
