టీడీపీ అధినేత చంద్రబాబు నాయుడు కుమారుడు లోకేష్ చేసేది పాదయాత్ర కాదు.. ఈవినింగ్ వాక్ అని వెల్లంపల్లి శ్రీనివాస్ వెల్లడించారు. తాడేపల్లిలో మాజీ మంత్రి వెల్లంపల్లి శ్రీనివాస్, మల్లాద్రి విష్ణు, దేవినేని అవినాష్ లు ప్రెస్ మీట్ నిర్వహించారు. ఈ సందర్భంగా వెల్లంపల్లి మాట్లాడుతూ.. కొడుకు పాదయాత్రకు ప్రజాదరణ లేదని తెలుసుకొని పవన్ కళ్యాణ్ తో వారాహి యాత్ర చేయిస్తున్నాడని విమర్శించారు.
ఈ యాత్రలో భాగంగా పవన్ మాట్లాడే మాటలు ఎవరికీ అర్థం కావు అన్నారు. దేవాలయాలను కూల్చేసిన చంద్రబాబు, లోకేష్, పవన్ హిందూ ద్రోహులని వెల్లంపల్లి ఆగ్రహం వ్యక్తం చేశారు. టీడీపీ, జనసేన వాళ్లకు జగనన్న సంక్షేమ పథకాలు ఇచ్చామన్నారు. ప్రస్తుతం ప్రజలందరూ జగన్ వైపే ఉన్నారని పేర్కొన్నారు. లోకేష్ చేసే పాదయాత్రపై అసలు చంద్రబాబుకి నమ్మకం ఉందా అని ప్రశ్నించారు. 175 నియోజకవర్గాల్లో పోటీ చేయగలరా అని సవాల్ విసిరారు. ప్రజాబలం ఉంటే అన్ని స్థానాల్లో పోటీ చేయాలని తెలిపారు. ఆర్యవైశ్యులను మోసం చేసిన వ్యక్తి చంద్రబాబు అని మండిపడ్డారు వెల్లంపలి. సినిమాలు, రాజకీయాల్లో పవన్ కళ్యాణ్ జీరో అన్నారు. సీఎం జగన్ ని ఏకవచనంతో దూషిస్తే సహించేది లేదని తెలిపారు వెల్లంపల్లి శ్రీనివాస్.
