దిల్లీ లిక్కర్ స్కామ్ కేసులో ఈడీ విడుదల చేసిన పత్రికా ప్రకటనపై ఆమ్‌ ఆద్మీ పార్టీ స్పందించింది. ఈడీ ప్రకటనను ఖండిస్తూ.. తీవ్ర లోక్‌సభ ఎన్నికల ముందు సీఎం అరవింద్‌ కేజ్రీవాల్‌ ప్రతిష్ఠను దెబ్బతీసేందుకే ఇలాంటి ఆరోపణలు చేస్తోందని మండిపడింది. ఈ దర్యాప్తు సంస్థ బీజేపీ పొలిటికల్‌ వింగ్‌లా పని చేస్తోందని ధ్వజమెత్తింది.
2021-22 దిల్లీ మద్యం విధాన రూపకల్పన, అమలు ద్వారా ప్రయోజనాలు పొందడానికి బీఆర్ఎస్ ఎమ్మెల్సీ కవిత, మరికొందరితో కలిసి అరవింద్‌ కేజ్రీవాల్‌, మనీశ్‌ సిసోదియా లాంటి ఆప్ అగ్రనేతలతో కలిసి కుట్ర పన్నారని ఈడీ తమ ప్రకటనలో వెల్లడించిన విషయం తెలిసిందే. ఈ ప్రయోజనాలకు ప్రతిఫలంగా ఆ పార్టీ నేతలకు రూ.100 కోట్లు చెల్లించడంలో కవిత భాగస్వామి అయ్యారని పేర్కొంది.
దీనిపై ఆమ్‌ ఆద్మీ పార్టీ తీవ్ర అభ్యంతరం వ్యక్తం చేస్తూ.. ఈ కేసులో 500లకు పైగా సోదాలు జరిపినా.. వేల మంది సాక్ష్యులను విచారించినా దర్యాప్తు సంస్థకు అక్రమంగా ఉన్నట్లు నిరూపించేలా ఒక్క రూపాయి కూడా లభించలేదని పేర్కొంది. చిన్న సాక్ష్యాన్ని కూడా రికవరీ చేయలేదని, అందుకే విసుగెత్తిపోయి ఇలాంటి ఆరోపణలు చేస్తోందని విమర్శించారు.
