జనసేన పార్టీ అధ్యక్షుడు పవన్ కల్యాణ్ ఎన్నికల ప్రచారంలో జోరు పెంచారు. వారాహి విజయభేరి యాత్రలో భాగంగా ఇవాళ (ఆదివారం) అనకాపల్లిలో పర్యటించనున్నారు. ఈరోజు మధ్యాహ్నం 3. 30 గంటలకు హెలికాప్టర్‌లో అనకాపల్లి డైట్‌ కాలేజ్ సమీపంలో గల ఒక ప్రైవేటు లే అవుట్‌లో ఏర్పాటు చేసిన హెలీప్యాడ్‌కు చేరుకోనున్నారు.
అక్కడి నుంచి రింగ్‌ రోడ్డులో గల ఎన్టీఆర్‌ విగ్రహం కూడలి, చేపల బజారు, చిన్న నాలుగు రోడ్ల కూడలి, కన్యకా పరమేశ్వరి జంక్షన్‌, వేల్పుల వీధి మీదుగా నెహ్రూ చౌక్‌ జంక్షన్‌ వరకూ వారాహి వాహనంలో పవన్ కల్యాణ్ రోడ్ షో నిర్వహిస్తారు. నాలుగు గంటలకు నెహ్రూ చౌక్‌ కూడలిలో వారాహి వాహనం మీద నుంచి ప్రజలను ఉద్దేశించి ఆయన ప్రసంగిస్తారు.
అనకాపల్లి నుంచి జనసేన పార్టీ తరపున ఎమ్మెల్యే అభ్యర్థిగా కొణతాల రామకృష్ణ ఎన్నికల్లో పోటీ చేస్తున్న విషయం తెలిసిందే. ఆయనకు మద్దతుగా జనసేనాని ఇవాళ ప్రచారం చేయనున్నారు. రోడ్ షోలో అనకాపల్లి సహా పలు సమస్యలపై జనసేనాని మాట్లాడే అవకాశం ఉంది.
