తెలంగాణలో వరుసగా పరీక్షల ఫలితాలు విడుదలవుతున్నాయి. ఇప్పటికే పది, ఇంటర్, ఈఏపీసెట్ ఫలితాలు విడుదల కాగా తాజాగా ఈసెట్ ఫలితాల విడుదలకు రంగం సిద్ధం అయింది. రాష్ట్ర వ్యాప్తంగా.. పాలిటెక్నిక్‌ డిప్లొమా, బీఎస్సీ (గణితం) విద్యార్థులు లేటరల్‌ ఎంట్రీ ద్వారా బీటెక్‌ , బీ – ఫార్మసీ రెండో ఏడాదిలో ప్రవేశానికి నిర్వహించిన ఈసెట్ ఫలితాలను ఈ నెల 20వ తేదీన విడుదల చేయనున్నారు. ఆరోజు మధ్యాహ్నం 12.30 గంటలకు ఉన్నత విద్యా మండలి కార్యాలయంలో ఛైర్మన్‌ లింబాద్రి ఫలితాలను విడుదల చేస్తారని ఈసెట్ కన్వీనర్‌ తెలిపారు.
మరోవైపు తెలంగాణ ఈఏపీ సెట్‌ ఫలితాలు శనివారం రోజున విడుదలయ్యాయి. హైదరాబాద్లో విద్యాశాఖ ముఖ్య కార్యదర్శి బుర్రా వెంకటేశం ఈ ఫలితాలను ప్రకటించారు. ఈ పరీక్షలో ఇంజినీరింగ్‌లో 74.98 శాతం , అగ్రికల్చర్, ఫార్మసీలో 89 శాతం విద్యార్థులు ఉత్తీర్ణత సాధించినట్లు బుర్రా వెంకటేశం పేర్కొన్నారు. ఈ పరీక్షకు 3,32,251 మంది విద్యార్థులు హాజరయ్యారని చెప్పారు. అగ్రికల్చర్, ఫార్మసీ విభాగాలకు 91,633 మంది, ఇంజినీరింగ్ విభాగంలో 2,40,618 మంది పరీక్ష రాశారని చెప్పారు.
