భారత్ – పాకిస్తాన్ మధ్య గత కొన్ని రోజులుగా కొనసాగుతున్న ఉద్రిక్తతలకు శనివారం సాయంత్రం నుంచి తాత్కాలికంగా తెరపడినట్లయింది. కేంద్ర విదేశాంగ కార్యదర్శి విక్రమ్ మిస్రీ వెల్లడించిన ప్రకారం, సాయంత్రం 5 గంటల నుంచి ఇరు దేశాలు కాల్పుల విరమణకు అంగీకరించాయని తెలిపారు. ఈ నెల 12న భారత్ – పాకిస్తాన్ మధ్య ప్రత్యక్ష చర్చలు జరగనున్నాయని, ఈ చర్చల అనంతరం శాంతి ప్రక్రియ మరింత ముందుకు సాగుతుందని చెప్పారు. ఇక ఈ కాల్పుల విరమణ ఒప్పందం పట్ల ప్రజాశాంతి పార్టీ అధ్యక్షుడు కేఏ పాల్ స్పందించారు. సోషల్ మీడియా వేదికగా ఒక వీడియో విడుదల చేసిన ఆయన, భారత్ – పాకిస్తాన్ మధ్య యుద్ధాన్ని తాను అడ్డుకున్నానని ప్రకటన చేశారు. “రాత్రింబగలు కష్టపడి భారత్ – పాక్ యుద్ధాన్ని నిలిపేశాను. అమెరికాలో రిపబ్లికన్లు, డెమోక్రాట్లు, ఇరు దేశాల నేతలతో చర్చలు జరిపాను. శాంతి కోసం ప్రయత్నాలు చేశాను,” అని పేర్కొన్నారు.
అంతకుముందు అమెరికా మాజీ అధ్యక్షుడు డొనాల్డ్ ట్రంప్ కూడా శాంతి స్థాపనలో తమ పాత్రను ప్రకటించారు. ట్వీటర్ (X) వేదికగా ఆయన చేసిన ప్రకటనలో, ఇరు దేశాలు కాల్పుల విరమణకు అంగీకరించాయని, అమెరికా ఈ ప్రక్రియలో మధ్యవర్తిత్వం వహించిందని తెలిపారు. భారత్ – పాకిస్తాన్‌కు ధన్యవాదాలు తెలియజేశారు. ఈ పరిణామాల నేపథ్యంలో, భారత – పాక్ సరిహద్దుల్లో ఉద్రిక్తతలు తగ్గుతాయన్న ఆశలు వ్యక్తమవుతున్నాయి. ప్రాంతీయ స్థాయిలో శాంతి నెలకొల్పేందుకు ఇవే తొలి అడుగులుగా విశ్లేషకులు అభిప్రాయపడుతున్నారు.
