నేటి ఆధునిక ప్రపంచంలో ఉమ్మడి కుటుంబ వ్యవస్థ కనుమరుగవుతోంది. ఉద్యోగాల కోసం పట్టణాలకు వలస వెళ్తున్న యువత తమ తల్లిదండ్రులను ఒంటరిగా వదిలేయడం, లేదా వృద్ధాశ్రమాలలో చేర్చడం మనం చూస్తున్నాం. పెద్దలు ఇంట్లో ఉంటే అది తమకు ఒక భారంగా భావిస్తున్నారు. కానీ, ఇంట్లో తాతా బామ్మలు ఉండటం పిల్లలకు ఎంతగానో మేలు చేస్తుందని, వారి మానసిక, శారీరక ఎదుగుదలకు అది ఎంతో అవసరమని చాలామందికి తెలియడం లేదు. తాతా బామ్మలతో గడపడం వల్ల పిల్లలకు కలిగే ప్రయోజనాలు మనము తెలుసుకుందాం..
భద్రత, ప్రేమ భావన: తాతా, బామ్మలు తమ మనవలు, మనవరాలను నిస్వార్థంగా ప్రేమిస్తారు. ఈ ప్రేమ పిల్లల్లో భద్రత ఆత్మవిశ్వాసం, ఆనందం వంటి సానుకూల భావాలను పెంచుతుంది. ఒత్తిడి లేని వాతావరణంలో పెరిగే పిల్లలు మానసికంగా దృఢంగా ఉంటారు.
సంస్కృతి, సంప్రదాయాల పరిచయం: తాతా, బామ్మలు పిల్లలకు కథలు, పురాణాలు, పండుగల విశిష్టత, ఆచార వ్యవహారాల గురించి వివరిస్తారు. ఇది పిల్లలకు మన సంస్కృతి, విలువలు, చరిత్ర గురించి తెలియజేస్తుంది. దీనివల్ల వారిలో తమ మూలాలపై గౌరవం పెరుగుతుంది.
సహనం, ఓర్పు పెంపు: పిల్లలు ఎంత అల్లరి చేసినా, తాతా, బామ్మలు సహనంతో వ్యవహరిస్తారు. వారి మాటలు, ప్రవర్తన పిల్లలకు ఓర్పు, శాంతి, ప్రేమ వంటి విలువలను నేర్పుతాయి. కష్ట సమయాలలో ఎలా నిలబడాలో నేర్పిస్తాయి.
సామాజిక నైపుణ్యాల అభివృద్ధి: పెద్దలతో కలిసి మెలిసి ఉండటం వల్ల పిల్లల్లో ఇతరులతో ఎలా మాట్లాడాలి, ఎలా గౌరవంగా ప్రవర్తించాలి, ఎలా సహాయం చేయాలి వంటి సామాజిక నైపుణ్యాలు మెరుగుపడతాయి. ఇది వారి భవిష్యత్తులో మంచి వ్యక్తులుగా ఎదగడానికి తోడ్పడుతుంది.
తల్లిదండ్రులకు తోడు: ఉద్యోగాలకు వెళ్లే తల్లిదండ్రులకు పిల్లలను చూసుకునే విషయంలో తాతా బామ్మలు అండగా ఉంటారు. ఇది తల్లిదండ్రులపై ఒత్తిడిని తగ్గిస్తుంది. అంతేకాకుండా, పిల్లలు తమ పెద్దల పట్ల ప్రేమను, శ్రద్ధను చూపడం చూసి, భవిష్యత్తులో తాము కూడా తమ తల్లిదండ్రులను అలానే చూసుకోవాలనే భావన వారిలో పెరుగుతుంది.
తాతా, బామ్మలు కేవలం ఇంట్లో ఉన్న పెద్దవారు కాదు, వారు జ్ఞాన సంపద, సంస్కృతి, ప్రేమలకు ప్రతీకలు. వారిని ఆదరించి ఇంట్లో ఉంచుకోవడం వల్ల పిల్లలు మంచి విలువలు, బలమైన మానసిక ఆరోగ్యంతో ఎదిగి, సమాజంలో మంచి పౌరులుగా రూపుదిద్దుకుంటారు.
గమనిక: పైన ఇచ్చిన సమాచారం కోసం మాత్రమే. కుటుంబ సంబంధాలలో ఏవైనా సమస్యలు ఉంటే, నిపుణుల సలహా తీసుకోవడం ఉత్తమం.
