యువ నటుడు సుశాంత్ సింగ్ ఆత్మహత్యతో బాలీవుడ్లోని బంధుప్రీతి అంశం చర్చనీయాంశమైంది. ఇప్పుడు మరోసారి ఇదే విషయం గురించి మాట్లాడిన నటి కంగనా రనౌత్.. మాఫియాలో మిగిలిపోయిన కొంతమంది వ్యక్తుల కనుసన్నల్లోనే హిందీ చిత్రసీమ నడుస్తోందని ఆరోపించింది. ‘కాఫీ విత్ కరణ్’ లాంటి అమసర్థ షోలతో ఇండస్ట్రీ నిండిపోయిందని తెలిపింది. విధేయత, విద్యా నేపథ్యం లాంటి నైతిక విలువలు ఉన్న వ్యక్తులు బాలీవుడ్ నుంచి ఎలిమినేట్ అవుతారని డా.సుబ్రహ్మణ్య స్వామి ఇటీవలే సంచలన వ్యాఖ్యలు చేశారు. ఈ నేపథ్యంలోనే కంగన స్పందిస్తూ ఈ ట్వీట్ చేసింది.
ఈ మధ్యన నెపోటిజమ్పై బాలీవుడ్ నటి కరీనా కపూర్ చేసిన వ్యాఖ్యలపై.. కంగనా రనౌత్ సోషల్ మీడియా టీమ్ విరుచుకుపడింది. ఇండస్ట్రీలో కరీన విజయానికి అర్హురాలు కాదని ఆరోపించింది. స్టార్ వారసులు పలుకుబడితోనే చిత్రసీమలో రాణిస్తున్నారని పేర్కొంది.ఈ విషయాన్ని వివాదంగా మార్చే ప్రయత్నం చేయొద్దని నెపోటిజం వారసులను ఉద్దేశించి కంగన టీమ్ హెచ్చరించింది. “మీ అధికారాలతో మాకు ఎటువంటి సమస్య లేదు. మీరు ప్రవర్తించే విధానంతోనే సమస్యంతా. మీ మాఫియా వల్లే సుశాంత్ చనిపోయాడు” అని పేర్కొంది.
