సౌత్ ఇండియన్ ఫిల్మ్ ఇండస్ట్రీలో అత్యంత ప్రతిష్ఠాత్మకంగా భావించే ‘సైమా’ (సౌత్ ఇండియన్ ఇంటర్నేషనల్ మూవీ అవార్డ్స్‌) వేడుకలు ఈసారి సెప్టెంబర్ 15, 16 తేదీల్లో దుబాయ్ వేడుకగా అంగరంగ వైభవంగా జరగనున్నాయి. ఈ క్రమంలో ఆదివారం హైదరాబాద్‌లో మీడియా సమావేశం నిర్వహించారు. ఈ సమావేశానికి టాలీవుడ్ స్టార్ హీరో రానా దగ్గుబాటి, హీరోయిన్లు మీనాక్షి చౌదరి, నిధి అగర్వాల్‌, సైమా ఛైర్పర్సన్ బృందా ప్రసాద్‌, మారుతి సుజుకీ ఇండియా సీనియర్ ఎగ్జిక్యూటివ్‌ డైరెక్టర్‌ శశాంక్‌ శ్రీవాస్తవ హాజరయ్యారు.
సైమా అంటే సౌత్ ఇండియా ఫిల్మ్ ఇండస్ట్రీస్ అన్నీ కలిసి జరుపుకునే వేడుక.. గత 11 ఏళ్లుగా నేను ఈ వేడుకల్లో భాగమవుతున్నాను అని రానా అన్నారు. ప్రతీసారి కొత్తగా మొదలుపెట్టిన ఉత్సాహం, సంతోషం కలుగుతోందని.. ఓ మంచి వేదికని ఏర్పాటు చేసి.. కళలపై ఒకే రకమైన అభిరుచి ఉన్న అందరినీ ఒకచోటకి చేర్చడంలో సైమా విజయవంతమైందని కొనియాడారు. అవార్డులు ఎవరికి వస్తే బాగుంటుందనే అంశం కంటే.. ఎంత ఎక్కువ మంది నటీనటులు ఈ వేడుకలో పాల్గొంటే అంత బాగుంటుందనేది తన అభిప్రాయమని రానా చెప్పుకొచ్చారు.
