శ్రావణ మాసం వచ్చిందంటే ప్రతి ఇల్లు ఓ దేవాలయంలా మారుతుంది. ఉదయం, మధ్యాహ్నం, సాయంత్రం ఇలా మూడు పూటల ప్రత్యేక పూజలతో ఇళ్లంతా ఆధ్యాత్మికత వెదజల్లుతుంది. అయితే ఈ పవిత్ర మాసంలో చేసే కొన్ని ప్రత్యేక పూజల వల్ల చాలా మంచి జరుగుతుందని పండితులు చెబుతుంటారు. ఈ మాసంలో ఇంట్లో తులసి మొక్క నాటితే ఆర్థిక పరమైన సమస్యలు తొలగిపోతాయట. ఇవే కాకుండా వాస్తు ప్రకారం ఇంకా కొన్ని మొక్కలను ఈ మాసంలో నాటితే ఇంటికి ఎంతో మంచిదని పండితులు అంటున్నారు. వాటి వల్ల ఇంట్లో ప్రశాంతతతో పాటు ఆరోగ్యం, ఐశ్వర్యం వెల్లివిరుస్తాయని చెబుతున్నారు. మరి శ్రావణ మాసంలో మీ ఇంట్లో నాటాల్సిన మొక్కల గురించి తెలుసుకోండి..
జమ్మి మొక్క.. ఇంట్లో జమ్మి మొక్క ఉంటే శుభం జరుగుతుందని పండితులు చెబుతున్నారు. ఈ మొక్కను పూజించడం వల్ల శని దేవుని అనుగ్రహం లభిస్తుంది. జమ్మితో పాటు తులసిని కూడా కలిపి నాటితే ఇంకా అనేక ప్రయోజనాలు ఉంటాయట.
అరటి మొక్క.. మీ ఇంటి ఆవరణంలో ప్రతికూలతను పోగొట్టడానికి అరటి మొక్కను నాటాలి. అరటి మొక్కను ప్రధాన ద్వారానికి కుడివైపున నాటితే సానుకూల ఫలితాలొస్తాయని వాస్తు పండితులు చెబుతున్నారు.
ఉమ్మెత్త మొక్క.. పరమేశ్వరునికి ప్రీతి పాత్రమైన ఉమ్మెత్త మొక్క ఇంట్లో ఉంటే చాలా మంచిది. ప్రతి శ్రావణ సోమవారం శివుడికి ఉమ్మెత్త పూలతో పూజచేస్తే శుభం కలుగుతుంది. ఎందుకంటే శివుడు ఈ పూలలో కొలువై ఉంటాడన్నది పూర్వీకుల నమ్మకం. అయితే ఈ మొక్కను ఆదివారం లేదా మంగళవారం రోజున నాటాలి. ఉమ్మెత్త ఉన్న ఇంట్లో ఉమామహేశ్వరులు కొలువై ఉంటారని పెద్దలు అంటుంటారు.
చంపా మొక్క.. వాస్తు శాస్త్రం ప్రకారం, మీ ఇంట్లో అరటి, చంపా మొక్కలు నాటడం వల్ల శుభం కలుగుతుంది. మీరు జీవితంలో ఆర్థిక పరమైన ఇబ్బందుల నుంచి విముక్తి పొందడమే కాదు.. డబ్బుకు సంబంధించిన ప్రయోజనాలను పొందుతారు. ఈ మొక్కను ఇంట్లోని వాయువ్య దిశలో నాటడం వల్ల అత్యంత శుభ ఫలితాలను పొందుతారని వాస్తు పండితులు చెబుతుంటారు.
