వంటకు ఆయిల్‌ వాడటం తప్పనిసరి.. కానీ ఏ ఆయిల్‌ వాడాలి అనేది ముఖ్యం..కొందరు సన్‌ఫ్లవర్‌ ఆయిల్‌ వాడతారు, కొందరు వేరుశనగ ఆయిల్‌ వాడతారు. కొందరు ఆలివ్‌ ఆయిల్‌ వాడతారు, కొబ్బరి నూనెను కూడా వాడేవాళ్లు ఉన్నారు. ఏ ఆయిల్‌ వాడినా ఒకటి గుర్తుపెట్టుకోవాలి.. మనం తీసుకునే ఆయిల్‌ శరీరంలోనే ఉంటుంది.. జీర్ణం అయి బయటకు వచ్చేశాతం చాలా అంటే చాలా తక్కువ.. అదే కొవ్వు రూపంలో పేరుకుపోతుంది. కేవలం చెమటోడ్చి కష్టపడితేనే ఆయిల్‌ అంటే ఆ కొవ్వు కరుగుతుంది. అయితే నువ్వుల నూనె వంటల్లో వాడటం వల్ల ఆరోగ్యానికి చాలా మంచిది అంటున్నారు నిపుణులు. దీనితో కలిగే ప్రయోజనాలు తెలిస్తే మీరు కచ్చితంగా ఈ నూనెను వంటల్లో భాగం చేసుకుంటారు.
నువ్వుల నూనె ఎందుకు తినాలి?
నువ్వుల నూనెతో కూరలు వండడం వల్ల ఎన్నో పోషకాలు శరీరానికి అందుతాయి. ముఖ్యంగా నువ్వుల నూనెలో విటమిన్ ఏ అధికంగా ఉంటుంది. నువ్వుల నూనెతో వండిన ఆహారాలను తినడం వల్ల శరీరంలో ఫ్రీ రాడికల్స్ వల్ల కలిగే నష్టం తగ్గుతుంది. ఇది యాంటీ ఆక్సిడెంట్‌లా పనిచేస్తుంది. ఈ నూనెలో బి విటమిన్లు, క్యాల్షియం, మెగ్నీషియం, ఐరన్ అధికంగా ఉంటాయి. ఇవన్నీ మన శరీరానికి అవసరమైనవే.
నువ్వుల నూనెలో మన శరీరానికి అవసరమైన మోనో అన్ శాచురేటెడ్, పాలీ అన్‌శాచురేటెడ్ కొవ్వులు ఉంటాయి. గుండె ఆరోగ్యంగా ఉండేందుకు ఈ కొవ్వులు చాలా అవసరం. ఇవి చెడు కొలెస్ట్రాల్ స్థాయిలను తగ్గిస్తాయి. దీనివల్ల గుండెపోటు, గుండె జబ్బులు వచ్చే అవకాశం చాలా వరకు తగ్గుతుంది.
నువ్వుల నూనెలో క్యాల్షియం అధికంగా ఉంటుంది. అందుకే నువ్వుల నూనె తిన్నవారి ఎముకలు చాలా బలంగా ఉంటాయి. ఒకప్పుడు నువ్వుల నూనె ఎక్కువగా ఆహారంలో వినియోగించేవారు. అందుకే వారు చాలా దృఢంగా ఉండేవారు. చిన్న పిల్లలకు నువ్వుల నూనెతో వండిన ఆహారాన్ని తినిపించడం చాలా ముఖ్యం.
జీర్ణ ఆరోగ్యాన్ని కాపాడడానికి నువ్వుల నూనె ఎంతో మేలు చేస్తుంది. నువ్వుల నూనెతో చేసిన ఆహారాలు మలబద్ధకాన్ని తగ్గిస్తాయి. అలాగే పొట్టలో ఉన్న మంచి బ్యాక్టీరియాను కాపాడేందుకు కూడా ఇవి సహకరిస్తాయి.
యువత నువ్వుల నూనెతో ఉండిన ఆహారాలను తింటే.. చర్మం, జుట్టు అందంగా మెరిసిపోతుంది. చర్మానికి, జుట్టుకు కావలసిన పోషణను నువ్వుల నూనె అందిస్తుంది. విటమిన్ ఈ చర్మాన్ని, జుట్టును మెరిపిస్తుంది. చర్మం ఆరోగ్యంగా, జుట్టు మెరుపుతో ఉండాలంటే నువ్వులను ఆహారంలో భాగం చేసుకోండి.
ఈరోజుల్లో వయసుతో సంబంధం లేకుంకడా ఎన్నో రకాల వ్యాధులు వస్తున్నాయి. అలాంటి వ్యాధులకు చెక్ పెట్టాలంటే రోగనిరోధక శక్తి బలంగా ఉండాలి. ఈ నువ్వుల నూనెలో యాంటీ ఆక్సిడెంట్లు, సమ్మేళనాలు ఎన్నో ఉంటాయి. ఈ రోగనిరోధక శక్తిని బలంగా మార్చి ఇన్ఫెక్షన్ల బారిన పడకుండా కాపాడతాయి. నువ్వుల్లో క్యాలరీలు అధికంగా ఉంటాయి, కాబట్టి సాధారణ నూనెతో పోలిస్తే నువ్వుల నూనెను తక్కువగా వినియోగిస్తే మంచిది.
అంటే రెండు స్పూన్ల సాధారణ నూనె వాడే దగ్గర కేవలం ఒక స్పూన్ నువ్వుల నూనె వాడితే సరిపోతుంది. లేదా ప్రతిరోజు నువ్వుల నూనెతో వండే కన్నా… వారానికి నాలుగైదు సార్లు నువ్వుల నూనె వంటలను తింటే అన్ని పోషకాలను అందుతాయి. నువ్వులు వేడి చేస్తాయి అంటారు కదా.. మరి నువ్వుల ఆయిల్‌తో తింటే వేడి చేయదా అని డౌట్‌ రావొచ్చు.. నువ్వులు తిన్నా, నువ్వులు నూనెతో చేసిన వంటలు తిన్నా.. వాటర్‌ ఎక్కువగా తాగాలి..మజ్జిగ కూడా తాగుతుండాలి. అప్పుడే రెండూ బ్యాలెన్స్‌ అవుతాయి.
