మధ్యప్రదేశ్ రత్లాంలో పెను ప్రమాదం తప్పింది. నగరంలోని బైపాస్ మార్గంలో ఓ యాసిడ్ ట్యాంకర్ లీకేజీకి గురైంది. ఆ ప్రాంతం మొత్తం తెల్లటి పొగతో నిండిపోయింది. దీంతో పరిసర ప్రాంత ప్రజల్లో భయాందోళనలు నెలకొన్నాయి.క్లోరోసల్ఫోరిక్ యాసిడ్ నింపుకొని నగ్దా నుంచి గుజరాత్లోని అహ్మదాబాద్ వైపునకు ట్యాంకర్ వెళుతున్న క్రమంలో ఈ ఘటన జరిగింది.
రత్లాంలోని బైపాస్ రోడ్డులో లీకేజీ కాగా.. భారీగా తెల్లటి పొగ ఆ ప్రాంతాన్ని కమ్మేసింది. లీకేజీని గుర్తించిన డ్రైవర్ వెంటనే లారీని ప్రధాన రహదారి నుంచి పక్క దారిలోకి తీసుకెళ్లి నిలిపేశాడు.ఆ తర్వాత అహ్మదాబాద్ డ్రెస్సింగ్ కంపెనీకి చెందిన సిబ్బంది, సంఘటనాస్థలానికి చేరుకుని యాసిడ్ను మరో ట్యాంకర్లోకి మార్చారు. ఎలాంటి ఆస్తి, ప్రాణ నష్టం జరగకపోవటం వల్ల అంతా ఊపిరిపీల్చుకున్నారు. ఇలాంటి విపత్కర ప్రమాదాలు చోటుచేసుకున్నప్పుడు స్థానిక ప్రజలు, రహదారులకు ఇరువైపులా ఉన్న కుటుంబాలు భయబ్రాంతులకు గురవుతారు.
