కష్టాలు ఎల్లకాలం ఉండవు.. ధైర్యంగా ఉండండి అంటూ పార్టీ శ్రేణులకు వైఎస్ జగన్ కీలక సూచనలు చేశారు. తాజాగా ఇవాళ ఆయన పులివెందులలో పర్యటిస్తున్నారు. పులివెందులలోని భాకరాపురంలో ఉన్న క్యాంపు కార్యాలయంలో కార్యకర్తలు, ప్రజలు, నేతలు, అభిమానులతో మమేకమయ్యారు. ఈ నేపథ్యంలో జగన్ క్యాంపు కార్యాలయం వద్దకు వచ్చిన వారందరినీ పేరు పేరునా పలకరించి వారి కష్టసుఖాలు తెలుసుకోవడంతో పాటు వాటి పరిష్కారానికి చొరువ చూపారు.
వారి బాధలు, కష్టాలు, సమస్యలు వింటూ నేను ఉన్నాను అంటూ భరోసాతో పాటు ధైర్యాన్ని కల్పించారు. కూటమి ప్రభుత్వం అధికారంలోకి వచ్చిన తరువాత వైసీపీ నాయకులు, కార్యకర్తలపై దాడులు జరుగుతున్నాయని పలువురు జగన్ దృష్టికి తీసుకొచ్చారు. ఈ నేపథ్యంలో టీడీపీ అరాచకాలను పార్టీ శ్రేణులు ధైర్యంగా ఎదుర్కోవాలని సూచించారు. ప్రతీ ఒక్కరూ పోరాట పంథాను ఎంచుకొని ముందుకు సాగాలని పార్టీ శ్రేణులకు పిలుపునిచ్చారు వైఎస్ జగన్.
