ఐఐటీ హైదరాబాద్ విద్యార్థుల వరుస ఆత్మహత్యలు కలకలం రేపుతున్నాయి. ఇటీవలే ఓ ఎంటెక్ విద్యార్థి బలవన్మరణానికి పాల్పడగా.. తాజాగా మరో విద్యార్థి ఆత్మహత్యకు పాల్పడ్డాడు. సంగారెడ్డి జిల్లా కంది మండలంలోని ఐఐటీ హైదరాబాద్ క్యాంపస్‌లో చదువుతున్న విద్యార్థి పోతిరెడ్డిపల్లిలో ఆత్మహత్య చేసుకున్నాడు.
బీటెక్ కెమికల్‌ ఇంజినీరింగ్‌ చదువుతున్న మెఘా కపూర్ సంగారెడ్డి పోతిరెడ్డిపల్లిలోని ఓ హోటల్‌పై నుంచి దూకి సూసైడ్‌ చేసుకున్నాడు. అతడి స్వస్థలం రాజస్థాన్‌లోని జోధ్ పూర్. ఐఐటీ హైదరాబాద్‌లో మూడు నెలల క్రితమే బీటెక్ పూర్తి చేసిన మేఘా కపూర్.. 3 నెలల నుంచి సంగారెడ్డిలోని ఓ లాడ్జిలో రూమ్ తీసుకుని ఉంటున్నట్లు అధికారులు తెలిపారు. సమాచారం అందుకున్న పోలీసులు సంఘటనా స్థలానికి చేరుకున్నారు. కేసు నమోదు చేసుకుని ఆత్మహత్యకు గల కారణాలు సేకరిస్తున్నారు.
ఎంటెక్ చదువుతున్న రాహుల్ అనే విద్యార్థి ఆగస్టు 31న క్యాంపస్ రూంలో ఉరేసుకుని ఆత్మహత్యకు పాల్పడ్డాడు. రాహుల్ మృతిచెందిన 8 రోజులకే మరో విద్యార్థి ఆత్మహత్య చేసుకోవడంతో హైదరాబాద్ ఐఐటీలో ఆందోళన నెలకొంది.
