కూల్‌డ్రింక్స్‌ అంటే ఇష్టపడనివారు చాలా అరుదుగా ఉంటారు. అవి తాగటం ఆరోగ్యానికి ఏమంత మంచిది కాదని తెలిసి కూడా తాగేవాళ్లే ఎక్కువ. ఎప్పుడో ఒసారి తాగితే ఏం అవుతుందిలే అనుకుని తాగేస్తుంటాం. ముఖ్యంగా మసాలా ఐటమ్స్ తిన్నప్పుడు కూల్‌డ్రింక్స్‌ తాగితే బాగుంటుంది. అసలు బిర్యాని విత్ కూల్‌డ్రింక్స్‌ కాంబినేషన్ అదిరిపోతుంది. ఎంతో ప్రేమగా తాగే రెండు గ్లాసుల శీతల పానీయం మిమ్మల్నే మింగేస్తుంది. తీవ్రమైన క్యాన్సర్ బారిన పడేలా చేస్తుంది.
గట్ జర్నల్‌లో ప్రచురించిన పరిశోధన ప్రకారం..ప్రతిరోజూ రెండు లేదా అంతకంటే ఎక్కువ కూల్ డ్రింక్స్ తాగేవారిలో పెద్దప్రేగు క్యాన్సర్ ప్రమాదానికి గురవుతున్నారని తేలింది. ఈ పరిశోధనలో ఫ్రూట్ ఫ్లేవర్డ్ డ్రింక్స్, స్పోర్ట్స్ డ్రింక్‌, ఎనర్జీ డ్రింక్స్ ఆరోగ్యానికి ప్రమాదకరమైనవిగా తేలాయి. కూల్‌డ్రింక్స్‌ తాగే మహిళలు 50 ఏళ్లు నిండకముందే క్యాన్సర్ బారిన పడే ప్రమాదం ఉంటుందట. పెద్దప్రేగు క్యాన్సర్ చాలా ప్రాణాంతకం. అయితే దానిని ప్రారంభ దశలో గుర్తించి చికిత్స తీసుకుంటేనే ఇది కంట్రోల్‌ అవుతుంది.
పరిశోధన ఎలా చేశారంటే..
ఈ పరిశోధనలో 95,464 మందిని సుమారు 24 సంవత్సరాలు పర్యవేక్షించారు. ఈ పరిశోధనలో కూల్‌డ్రింక్స్‌, ఇతర చక్కెర పానీయాలు ఎక్కువగా తీసుకున్న 109 మంది మహిళలకు 50 ఏళ్లలోపు పెద్దప్రేగు క్యాన్సర్ సమస్య ఉన్నట్లు కనుగొన్నారు. ఒక రోజులో ఒకటి కంటే ఎక్కువ కూల్‌డ్రింక్స్‌ తాగే మహిళల్లో క్యాన్సర్ వచ్చే ప్రమాదం ఎక్కువగా ఉందని పరిశోధనలో వెల్లడైంది. అయితే వారానికి ఒక కూల్‌డ్రింక్‌ తాగే మహిళలకు క్యాన్సర్ వచ్చే ప్రమాదం తక్కువగా ఉందట. కూల్‌డ్రింక్స్‌ని తక్కువగా తీసుకుంటే పెద్దప్రేగు క్యాన్సర్ ప్రమాదాన్ని చాలా వరకు తగ్గించవచ్చని పరిశోధకులు అంటున్నారు.
నిపుణుల అభిప్రాయం ప్రకారం.. కూల్‌డ్రింక్స్‌ ఆరోగ్యానికి హానికరం. ఈ పానీయాలలో కృత్రిమ చక్కెర, ప్రిజర్వేటివ్‌లు మొదలైన వాటిని ఉపయోగిస్తారు. దీని అధిక వినియోగం ఊబకాయం సమస్యను పెంచుతుంది. పెరుగుతున్న స్థూలకాయం కారణంగా చిన్నతనంలోనే ప్రీమెచ్యూర్ హార్ట్, బీపీ, మధుమేహం, థైరాయిడ్, హార్మోన్ల సమస్యలు వస్తాయి.
ఈ పానీయాలు మీ కాలేయానికి కూడా హాని చేస్తాయి. ఫ్రక్టోజ్‌ను జీర్ణం చేయడానికి కాలేయం చాలా కష్టపడాలి. దీని కారణంగా చాలా సార్లు కాలేయంలో వాపు ఏర్పడుతుంది. అందువల్ల యువత పిల్లలతో సహా ఏ వయస్సు వారైనా సరే.. శీతలపానియాల వినియోగానికి దూరంగా ఉంటే మంచిది. ఎప్పుడో…ఒకసారి అయితే పర్లేదు..కొందరికి వారానికి కనీసం మూడునాలుగు సార్లు తాగే అలవాటు ఉంటుంది. వీలైనంత త్వరగా ఈ అలవాటును మానుకోవడానికి ప్రయత్నించండి.
