ఛత్తీస్‌గఢ్ రాష్ట్రంలోని బల్‌రామ్ పూర్ జిల్లాలో ఘోర ప్రమాదం చోటుచేసుకుంది. కారు అదుపుతప్పి చెరువులో పడిపోవడంతో అందులోని ప్రయాణికులు అంతా మృతి చెందినట్లు తెలుస్తోంది. వీరంతా దీపావళి పండుగ నేపథ్యంలో బంధువుల ఇంటికి వెళ్లి తిరిగి వస్తుండగా.. ప్రమాదం సంభవించినట్లు తెలుస్తోంది. కారు డ్రైవర్ నిద్రమత్తులోకి జారుకోగా వాహనం అదుపుతప్పి చెరువులోకి దూసుకెళ్లినట్లు కథనాలు వస్తున్నాయి.
శనివారం రాత్రి సమయంలో ఈ ఘటన చోటుచేసుకోగా.. ఆదివారం ఉదయం ఈ విషయం వెలుగులోకి వచ్చింది. ప్రమాదం జరిగిన సమయంలో కారు మొత్తం 8 మంది ఉండగా..అందరూ ప్రాణాలు కోల్పోయినట్లు సమాచారం. విషయం తెలియగానే పోలీసులు అక్కడకు చేరుకుని క్రేన్ సాయంతో కారును వెలికితీసినట్లు తెలుస్తోంది. మృతదేహాలను గుర్తించే పనిలో అధికారులు నిమగ్నమయ్యారు.కాగా, ఈ ఘటనకు సంబంధించి పూర్తి వివరాలు తెలియాల్సి ఉంది.
