గోషామహల్ ఎమ్మెల్యే ప్రజాగోస-భాజపా భరోసా యాత్ర నుంచి అర్ధంతరంగా వెళ్లిపోయారు. స్థానిక నేతలు, కార్యకర్తలకు చెప్పాపెట్టకుండా వాకౌట్ చేశారు. అయితే ఆయన అలిగి వెళ్లారని కాషాయ నేతలు భావిస్తున్నారు. ఇంతకీ రాజాసింగ్ సొంత పార్టీ నాయకులపైనే ఎందుకు అలిగారు..?
నిజామాబాద్ జిల్లా బోధన్ పట్టణంలో “ప్రజాగోస.. భాజపా భరోసా” యాత్ర కొనసాగుతోంది. ఈ యాత్రంలో రాజాసింగ్ తో పాటు పలువురు భాజపా అగ్రనేతలు పాల్గొంన్నారు. ఈ క్రమంలోనే.. ఈరోజు యాత్ర జరుగుతుండగానే రాజాసింగ్ కాన్వాయ్ మధ్యలో నుంచి వెళ్లిపోయారు. ఏడు రోజులుగా యాత్ర కొనసాగుతున్నా.. జనం నుంచి ఆదరణ అంతంతమాత్రంగానే ఉంది. దీనిపై ఇప్పటికే రాజాసింగ్ కాస్త అసంతృప్తిగా ఉన్నట్టు సమాచారం. అయితే ఈరోజు కూడా.. యాత్రలో జనం అంతగా పాల్గొనకపోవటంతో కొంత అసహనానికి లోనైనట్టు తెలుస్తోంది. ఈ క్రమంలోనే రాజాసింగ్ ఏకంగా కాన్వాయ్ మధ్యలో నుంచి వాకౌట్ చేశారు.
తాను వెళ్లిపోతున్నట్టు కనీసం.. జిల్లా, నియోజకవర్గ నాయకులకు కూడా సమాచారం ఇవ్వకపోవటం గమనార్హం. రాజాసింగ్ వాకౌట్తో ఉలిక్కిపడ్డ భాజపా నాయకులు.. ఏం జరిగిందో..? ఏం చేయాలో.. తెలియక తలలుపట్టుకున్నారు. చేసేదేమీలేక ముఖ్య అతిథి లేకుండానే వచ్చిన ఆ కొంత మంది కార్యకర్తలతోనే సభను కొనసాగించారు. అయితే.. రాజాసింగ్ అలక మాత్రం భాజపా జిల్లా, నియోజకవర్గ నాయకులపైనే అని అర్థమవుతోంది. యాత్రకు జనసమీకరణ చేయలేకపోయారనో.. లేక జనంలోకి పార్టీని సరిగ్గా తీసుకెళ్లలేకపోతున్నారనో.. కారణమేదైనా జిల్లా, నియోజకవర్గ నాయకుల పనితీరు నచ్చకపోవటమే రాజాసింగ్ అలకకు కారణమని.. శ్రేణుల్లో గుసగుసలు వినిపిస్తున్నాయి.
