అనర్హత వేటుకు గురైన కాంగ్రెస్ నేత రాహుల్ గాంధీకి తన అధికారిక బంగ్లాను ఖాళీ చేయాల్సిందిగా నోటీసులు జారీ చేసిన విషయం తెలిసిందే. ఢిల్లీలోని తుగ్లక్ లైన్ – 12 లో ప్రభుత్వం కేటాయించిన బంగ్లాను ఏప్రిల్ 22 లోగా ఖాళీ చేయాలని సోమవారం సాయంత్రం నోటీసులు జారీ చేశారు. లోక్సభ హౌసింగ్ కమిటీ ఈ నోటీసులను జారీ చేసింది. నిబంధనల ప్రకారం అనర్హుడైన పార్లమెంటేరియన్ ప్రభుత్వ వసతికి అర్హులు కారని నోటీసులలో పేర్కొన్నారు.
అధికారిక నివాసాన్ని ఖాళీ చేసేందుకు రాహుల్ గాంధీకి 30 రోజుల సమయం ఇచ్చారు. ఈ నేపథ్యంలో ప్రభుత్వ బంగ్లాను ఖాళీ చేస్తానని రాహుల్ గాంధీ లోక్సభ హౌసింగ్ కమిటీకి లేఖ రాశారు. అధికారుల ఆదేశాలను తాను తప్పకుండా పాటిస్తానని పేర్కొన్నారు. ఆ బంగ్లాలో తనకి చాలా ఆనందకరమైన జ్ఞాపకాలు ఉన్నాయని.. కానీ లేఖలో పేర్కొన్న విధంగా వ్యవహరించడానికి తాను ఎప్పుడు సిద్ధంగానే ఉన్నానని, తన బాధ్యతగా బంగ్లాను ఖాళీ చేస్తానని లేఖలో వెల్లడించారు రాహుల్ గాంధీ.
