ఇజ్రాయెల్, హమాస్ల మధ్య యుద్ధం తీవ్రంగా మారింది. ఓవైపు ఇజ్రాయెల్పై హమాస్ తీవ్ర దాడులకు తెగబడుతోంటే.. మరోవైపు హమాస్ను సమూలంగా నాశనం చేసేందుకు ప్రతిన పూనిన ఇజ్రాయెల్ గాజాపై విరుచుకు పడుతోంది. ఇజ్రాయెల్ సైన్యం-హమాస్ మిలిటెంట్ల మధ్య భీకర పోరుతో గాజా ప్రాంతంలో బీతావహ పరిస్థితులు నెలకొన్నాయి. మరోవైపు తినడానికి తిండి, తాగేందుకు నీరు సైతం లేక గాజా, వెస్ట్‌బ్యాంక్‌లో తీవ్ర మానవతా సంక్షోభం తలెత్తింది.
ఈ నేపథ్యంలో అమెరికా అధ్యక్షుడు జో బైడెన్ ఓ కీలక ప్రకటన చేశారు. మానవతా దృక్పథంతో గాజా, వెస్ట్‌బ్యాంక్‌కు 100 మిలియన్‌ డాలర్ల మానవతా సాయాన్ని ప్రకటించారు. ఈ మేరకు ఆయన ఎక్స్‌ (ట్విటర్‌)లో ప్రకటన చేశారు. ఇజ్రాయెల్ ప్రధాని బెంజిమన్‌ నెతన్యాహుతో భేటీ తర్వాత.. బైడెన్ ఈ ప్రకటన చేశారు. ఇజ్రాయెల్- హమాస్ మధ్య భీకర పోరు నేపథ్యంలో ఇతర ప్రాంతాలకు తరలివెళ్లిన 10 లక్షల మందికి పైగా ప్రజలకు, యుద్ధ ప్రభావిత పాలస్తీనియన్లకు ఈ సాయం ఉపయోగపడుతుందని బైడెన్ వెల్లడించారు.
“నేను ఒక సందేశంతోనే ఇజ్రాయెల్‌కు వెళ్లాను. ఆ దేశం ఒంటరి కాదు. అమెరికా ఉన్నంత కాలం ఇజ్రాయెల్‌కు అండగా నిలబడతాం. మెజారిటీ పాలస్తీనా ప్రజలకు హమాస్‌తో అసలు సంబంధం లేదు. గాజా ఆస్పత్రిపై జరిగిన దాడికి కారణం ఇజ్రాయెల్ సైన్యం కాదని తెలుస్తోంది” అని బైడెన్ ట్వీట్లో పేర్కొన్నారు.
I just announced $100 million for humanitarian assistance in Gaza and the West Bank.
This money will support over 1 million displaced and conflict-affected Palestinians.
And we will have mechanisms in place so this aid reaches those in need – not Hamas or terrorist groups.
— President Biden (@POTUS) October 18, 2023
