ఆంధ్రప్రదేశ్ ముఖ్యమంత్రి పార్టీ రంగుల విషయంలో కీలక నిర్ణయం తీసుకున్నారు. రాష్ట్రంలో పంచాయతీ, ప్రభుత్వ కార్యాలయాలకు పార్టీ రంగులను మార్చాలంటూ ఇటీవల హైకోర్టు ఆదేశించిన సంగతి తెలిసిందే. వీటిని ఇన్నాళ్ళు జగన్ పట్టించుకోలేదు. ఇప్పుడు ఇక ఈ విషయంలో ముందుకి వెళ్ళడమే మంచిది అనే అభిప్రాయానికి జగన్ దాదాపుగా వచ్చేసినట్టే సమాచారం, వాటిని మార్చడానికి సిద్దమయ్యారు.
ఈ విషయమై సీసీఎల్ఏ (భూ పరిపాలన ప్రధాన కమిషనర్) ఆధ్వర్యంలో త్రిసభ్య కమిటీని ఏర్పాటు చేసింది రాష్ట్ర ప్రభుత్వం. ప్రస్తుతం ఉన్న రంగులను మార్చి కొత్త రంగులను వేయాలా? లేకపోతే ఉన్న రంగుల్లోనే కొన్ని మార్పులు చేయాలా? అనే విషయంలో ఆ కమిటీ పరీశీలించి ప్రభుత్వానికి తుది నివేదిక ఇచ్చిన తర్వాత దీనిపై నిర్ణయం తీసుకునే అవకాశాలు కనపడుతున్నాయి. నివేదిక వారం రోజుల్లో ప్రభుత్వానికి చేరుతుంది.
అప్పుడు దీనిపై రాష్ట్ర ప్రభుత్వం నిర్ణయం తీసుకుంటుంది. అయితే ఆ రంగుల్లో స్వల్ప మార్పులు చేసే అవకాశాలు కనపడుతున్నాయి. బులుగు రంగునే మొత్తం వెయ్యాలని భావిస్తున్నారు. వైసీపీ అనగానే చాలా మందికి బ్లూ కలర్ కనపడుతుంది. దీనితో ఆ రంగుని పూర్తి స్థాయిలో ఉంచాలని భావిస్తున్నారు. ప్రభుత్వ కార్యాలయాలకు వైఎస్ఆర్ కాంగ్రెస్ పార్టీ జెండా గుర్తులను వేశారంటూ టీడీపీ పిటీషన్ వేసింది. సుప్రీం కోర్ట్ కి వెళ్ళినా సరే హైకోర్ట్ ఇచ్చిన తీర్పుని సమర్ధించింది.
