ఈ రోజు ఉదయం వైసీపీ తన మేనిఫెస్టోనురిలీజ్ చేసిన విషయం తెలిసిందే. సీఎం జగన్ మోహన్ రెడ్డి తాడేపల్లిలో మీడియా సమావేశం నిర్వహించి 9 ముఖ్యమైన హామీలతో కూడిన మేనిఫెస్టోను రిలీజ్ చేశారు.
ఇక ఈ మేనిఫెస్టో లోని అంశాలపై కారుమూరి వెంకట నాగేశ్వరరావు స్పందిస్తూ…నవరత్నాలు మరింత ప్రకాశవంతంగా మెరిసే విధంగా ఈ మేనిఫెస్టోను రూపకల్పన చేశారని మంత్రి కారుమూరి కొనియాడారు. ఈ రోజు పశ్చిమ గోదావరి జిల్లా తణుకులో ఆయన మాట్లాడుతూ..ప్రతిపక్షాలు సైతం ముక్కు మీద వేలేసుకునేలా ఈ మేనిఫెస్టో రూపకల్పన జరిగిందని అన్నారు. దేశంలోనే ఏ జాతీయ పార్టీ కూడా ఈ స్థాయిలో మేనిఫెస్టో పెట్టలేదని.. మన పార్టీ గతంలో విడుదలన చేసిన మేనిఫెస్టో వందకి 99% పూర్తి చేసామని ఆయన తెలిపారు. ఇప్పుడు విడుదల చేసిన మేనిఫెస్టో కూడా 100కు 100% పూర్తి చేస్తామని పేర్కొన్నారు. టీడీపీ మేనిఫెస్టోలాగా వెబ్సైట్ నుంచి మేనిఫెస్టో తొలగించే పరిస్థితి మాది కాదని అన్నారు. మాటిచ్చామంటే చేస్తామని, గతంలో మన మేనిఫెస్టోలో చెప్పనివి కూడా చేశామని ఆయన గుర్తు చేశారు.
