కాన్పూర్ మోస్ట్ వాంటెడ్ గ్యాంగ్ స్టర్ వికాస్ దూబే అరెస్టు అయ్యాడు. మ‌ధ్య ప్ర‌దేశ్‌లోని ఉజ్జెయినిలో వికాస్‌ను పోలీసులు అరెస్టు చేసిన‌ట్లు స‌మాచారం. ఉత్త‌ర ప్ర‌దేశ్‌కు చెందిన గ్యాంగ్‌స్ట‌ర్ వికాస్ దూబే‌పై 5 ల‌క్ష‌ల రివార్డు ఉంది. వికాస్ కోసం గ‌త అయిదు రోజుల నుంచి యూపీ పోలీసులు విస్తృతంగా గాలిస్తున్నారు. ఇప్ప‌టికే ఈ కేసుతో లింకు ఉన్న న‌లుగురు క్రిమిన‌ల్స్‌ ను పోలీసులు ఎన్‌కౌంట‌ర్ చేశారు. ఉజ్జెయినిలో మ‌హాకాళేశ్వ‌రుడికి పూజ‌లు నిర్వ‌హించేందుకు వికాస్ అక్క‌డ‌కు వెళ్లిన‌ట్లు తెలుస్తోంది.
మ‌హాకాళేశ్వ‌రుడి ఆల‌యంలో ప‌నిచేస్తున్న ఓ గార్డు అత‌న్ని నిర్బంధించిన‌ట్లు తెలుస్తోంది. మ‌ధ్య‌ప్ర‌దేశ్ సీఎం శివ‌రాజ్ సింగ్ చౌహాన్‌కు ఆ రాష్ట్ర డీజీపీ ఈ విష‌యాన్ని తెలియ‌జేశారు. దూబే అరెస్టు గురించి యూపీ సీఎం యోగికి కూడా శివ‌రాజ్ చెప్పిన‌ట్లు స‌మాచారం. కాన్పూరులో అత్యంత పాశవికంగా 8 మంది పోలీసులను చంపేసిన కరుడుగట్టిన గ్యాంగ్ స్టర్ వికాస్ దూబే.
