ఆంధ్రప్రదేశ్లో మాజీ ముఖ్యమంత్రి చంద్రబాబు అరెస్ట్ సబబు కాదని బీజేపీ ఓబీసీ మోర్చా అధ్యక్షుడు లక్ష్మణ్ అన్నారు. బీజేపీ ఈ అరెస్టును తప్పుబడుతోందని తెలిపారు. ఆయనను ఎలాంటి వివరణ లేకుండా అరెస్టు చేశారని గుర్తు చేశారు. ఎఫ్ఐఆర్లో పేరు చేర్చలేదని మండిపడ్డారు. కేంద్ర ప్రభుత్వం జమిలీ ఎన్నికలు జరిపేందుకు సన్నాహాలు వేగంగా చేస్తోందని తెలిపారు. మాజీ రాష్ట్రపతి నివేదిక వచ్చిన అనంతరం.. పార్లమెంట్లో బిల్లు పెట్టి అందరి అభిప్రాయాన్ని తీసుకున్న తర్వాతే నిర్ణయం ఉంటుందని స్పష్టం చేశారు.
చంద్రబాబును ఏపీ సీఐడీ పోలీసులు స్కిల్ డెవలప్మెంట్ కేసులో శనివారం ఉదయం అరెస్ట్ చేశారు. ఏసీబీ కోర్టు రిమాండ్ విధించడంతో రాజమహేంద్రవరం సెంట్రల్ జైలుకి పోలీసులు తరలించారు. మరోవైపు, చంద్రబాబు హౌస్ రిమాండ్‌కు సంబంధించి దాఖలైన పిటిషన్‌పై విచారణ పూర్తయింది. హౌస్ రిమాండ్ కంటే చంద్రబాబుకు రాజమండ్రి కేంద్రకారాగారంలోనే భద్రత ఉంటుందని సీఐడీ వాదనలు వినిపించింది. ఈ క్రమంలో కేంద్రకారాగారంలో భద్రతపై మరింత వివరణ కావాలని చంద్రబాబు న్యాయవాది సిద్ధార్థ లూథ్రాను ఏసీబీ కోర్టు న్యాయమూర్తి అడిగారు. చంద్రబాబుకు ముప్పు విషయంలో సంబంధిత అంశాలను లూథ్రా… న్యాయమూర్తికి వివరించారు.
