కర్ణాటకలోని బెంగళూరులో ఐటీ అధికారుల దాడులు కొనసాగుతూనే ఉన్నాయి. ఇటీవల జరిపిన ఐటీ దాడుల్లో ఓ మాజీ కార్పొరేటర్ ఇంట్లో రూ.42 కోట్లు పట్టుబడిన విషయం తెలిసిందే. అది మరవక ముందే మరో వ్యక్తి ఇంట్లో తాజాగా రూ.40 కోట్లు దొరికాయి. ఐటీ సోదాల్లో ఇలా రోజూ భారీగా నగదు బయటపడుతుతోంది. రాజాజీనగర్ కేటమారనహళ్లిలోని బిల్డర్ అపార్ట్మెంట్లోని 5వ అంతస్తులో శనివారం రోజున ఐటీ అధికారులు సోదాలు నిర్వహించారు. ఈ సోదాల్లో రూ.40 కోట్లు లభ్యమైనట్లు సమాచారం.
అయితే నగదు గురించి బిల్డర్ను ఆరా తీయగా.. ఓ మాజీ ఎమ్ఎల్సీ పేరు చెప్పాడని.. సదరు ఎమ్ఎల్సీ సోదరులను అధికారులు విచారించినట్లు తెలిసింది. నగదు ఎక్కడి నుంచి వచ్చిందనే విషయాలపై ఆరా తీశారని సమాచారం. సోదాలు ముగిశాక బిల్డర్కు ఐటీ అధికారులు నోటీసులు ఇచ్చారు. అందులో దొరికిన డబ్బు గురించి మరింత సమాచారం ఇవ్వాలని పేర్కొన్నట్లు తెలుస్తోంది. నగదులో పాటు స్వాధీనం చేసుకున్న కొన్ని డాక్యుమెంట్లను తమతో పాటు తీసుకెళ్లినట్లు సమాచారం.
